Ujor ka FKJGP sha ka MS bym biang ka rukom ai jingsumar ha Khliehriat Civil Hospital

By Mawphor Editor On Mar 8, 2025

Jowai, Lber, 07: Ka FKJGP-Khliehriat Circle ka la ai da ka jingthoh sha ka Medical Superintendent (MS) ka Civil Hospital Khliehriat East Jaiñtia Hills District halor ka jingbym biang ka rukom ai jingsumar jong ka Hospital sha ki paidbah kiba donkam jingsumar ha ka por kaba biang.
Katkum ka jingujor ba la ïoh pdiang, ka seng ka la pynpaw ba ha ka 27 tarik, Rymphang, 2025 ha ka por 7:30 baje mynmiet eiei ka don kawei longkmie ba leit shah sumar hapoh ka Hospital halor ka Bleeding Case (hap khun) bad ynda ka la poi ha Emergency Ward hadien ba ki doktor ki ladep pynkhuid ki la phah sha kamra thiah kiba kha khunlung (Antenatal Ward). Ka seng ka la kynnoh ba la shu phah khynñiat ïa ka Wheel Chair ba shong ka nongpang ha ki bahaïing.
“Shaei ki jah ki nongtrei hapoh ka Hospital kiba la ïoh da ka jingsiew ban trei ïa ka kam bad ym juh ïohsngew koit ba ki hospital ki phah khynniat ïa ki Wheelchair ha ki nongpang khamtam kiba dang dep kha khunlung bad ki Bleeding Case,” la ong ka seng.
Kaba ar pat haba kynriah ïa ka nongpang na Khliehriat Civil Hospital sha MCH Jowai, ka seng ka la kynnoh ba u nongñiah u la pynher sted bha ïa ka kali Alto 800 haduh ba ka nongpang ka la ud shitom. “Ha ka jingshisha ki nongñiah kali ki dei ban tip kum kino kita ki jait jingjia kiba lah ban pynher sted ïa ka kali bad kum kino ki jait jingjia bym lah ban pynher sted ïa ka kali lada kum kine ki nongñiah ki don ka buh jingma pynban ïa ki nongpang,” la bynrap ka Seng.
Kaba lai pat ka seng ka sngewlyngngoh ban tip ba ha paiñkhana ki nongthiah ba armet wat tang u Bulblight ruh ym don, sngewsih ban tip ba ka hospital kam don pisa ban thied tang uwei u bulblight uba rit.
Kine ki jingujor jong ka seng kam mut ban kdew kti ïa ki jingduna jong ka Hospital bad ban kdew kti ïano ïano hynrei ban pynbha ïa ki jingduna ba ka Hospital ka don namar kum ka seng bad ki paidbah kim kwah ban don shuh kum kitei ki jingjia nangne shakhmat, la ong u kyrwoh na u President ka FKJGP-Khliehriat Circle East Jaiñtia Hills Bah Michal Chyrmang.