Khlierhiat, Naiwieng 01: Ki pulit East Jaiñtia Hills District hynne ka step sngi Balang ki la ioh ban kem noh ïa uwei u nongkhaïi drok bad ioh ruh ban kurup haduh 2.771 kilo u drok Amphetamine table napoh Datsympeiñ, Ladrymbai, East Jaiñtia Hills District.
Une u briew ïa uba la tip kyrteng kum u Sanju Singh uba shong ba sah ha Harijan Colony, Shillong u la shah kem noh katba u dang wan da ka bus night super kaba don ïa u nombor (AR 20 9990) kaba mih na Silchar da ka jingthmu ban wan sha Shillong ha ryngkat kine ki jingdih pynbuaid ba beaiñ.
Na ka liang u Superintendent of Police ka EJHD, u Jagpal Singh Dhanoa u la ong ba ki bor pulit hadien ba ki la ioh ïa ka jingtip kaba bniah ki la pynlong ka jingpynap shrip ha Ladrymbai Datsympeiñ ha ka por 5 baje mynstep bad ki la bat noh ïa katei ka bus night super.
Hadien ka jingtalasi ïa ka pla kieng jong u Sanju, ki pulit ki la ioh ban kurup noh haduh 2.771 kilo u dawai kuli pynbuaid, Amphetamine tablet.
Hadien kane ki pulit ki la kem noh ïa u Sanju bad rejistar ïa ka ejahar hapoh Khliehriat police station.Mynta ka jingtohkit ka la iaid shakhmat khnang ban lapdien shuh shuh ïa kiwei kiwei pat kiba donkti ha kine ki kam beaiñ, ong utei u heh pulit jong ka district.
