Khliehriat,Naiwieng 01: Ka Khliehriat Higher Secondary School, kawei na ki skul ba paw bha ha East Jaiñtia Hills District, mynta ka sngi ka la sdang ïa ka jingrakhe jubili ksiar ha kaba kum ka skul kaba dei ka shlem ai jingnang jingstad ka la iaid lyngba ïa ki san phew tylli ki mawmer jong ki san phew tylli ki snem ha ka jingshakri ban ai ïa ka stad ka tip ha ka thaiñ.
U kongsan, u bah Kyrmen Shylla u la kyntiew ïa ka lama jubili bad ka SDSEO East Jaiñtia Hills District, ka kong Perina Dkhar, ka la pyllait bad pyn her ïa ki baloon jubili.
U myntri ka sorkar jylla, uba dei ruh u MLA ka thaiñ, u bah Kyrmen Shylla, u la long kum u kongsan ha kane ka sngi u la ai ka jingkhublei kitbok kitrwiang bad u la ai sngewbha ruh T 1.00 lak tyngka kum ka jingnoh syniang sha kane ka skul.
Haba kren kum u kongsan, u bah Kyrmen Shylla, u la pynpaw ka jingsngew kmen, u ai ka jingkhublei kitbok kitrwiang bad sngew burom ïa ka Khliehriat Higher Secondary School bad ha ka jingkren jong u, u la kyrtiang dien ruh sha ka mynnor ba la leit ha kito ki por ba u dang long kum u khynnah skul uba pule ha kane ka skul bad ong ruh ba ka mynnor ba la leit ka dei kaba sah jingkynmaw shi junom ha ka jingim jong u.
Ki Bishop, ki Rev Father bad baroh kiba la ai jingkren ki la ka khublei jubili ïa ka Khliehriat Higher Secondary School ryngkat ki kyntien kitbok kitrwiang bad ruh ki kyntien sneng kyntu ki ban lam sha ka bha ka miat bad sha ka nam ka burom.
Khyndiat shaphang ka Khliehriat Higher Secondary School, ïa kane ka skul la seng nongrim naduh u snem 1974 bad dei ruh ha u snem 1979 ba u Fr Rev Henry Fantin u la wan sha kane ka skul ha Khliehriat bad long kum u Head Master, da ka jingtrei shitom bad jinglen lade jong u la lah ban kyntiew ïa kane ka skul sha ka kyrdan M.E School bad ha u snem 1986 la kyntiew shuh shuh sha ka Khliehriat High School kaba naduh ka klas ba 7 haduh ka klas ba 8, ha ka jingpeit jong u Fr Henry Fantin kum u Head Master lem bad u para jong u, u Fr Rev Joseph Fantin, u ba la long kum u Fr Priest ha kitei ki snem namar ka jingtrei shitom jong ki la kyntiew kyrdan shuh shuh ïa ka skul sha ka High School ha u snem 1995 bad katba nang iaid ki por ki snem ïa kane ka skul la kyntiew shuh shuh sha ka kyrdan Higher Secondary School ha kaba la ioh ruh ban pynrung ïa ka jingpule ha ka Arts, Science bad Commerce bad ki khynnah kiba pule mynta tang ïa kane ka kyrdan XI bad XII ki don mynta 400 ngut.
Ki khynnah kiba pule ha kane ka skul ki ju leit ban ïa shim bynta ha kiba bun ki jait jingiakop kiba ha ki kyrdan (level) bapher bapher ba kynthup ha ka jingialeh kai sport, ha ki Sceience Exhibiton, ki Quiz, jingiakop thoh Essay, ki jingiatai nia (debate) bad kiwei kiwei.
La sakhi lang ïa kane ka jingrakhe jubili ksiar ha kane ka sngi da u Most Rev Ferdinand Dkhar DD, uba dei ruh u Bishop Jowai Diocese, u Rev Fr Paul Olphindro Lyngdoh, SDB jong ka Provincial jong ka Shillong Province, ki Principal ba rim kum u Fr Josh, ki nonghikai kiba la shongthait ba kynthup u babu Louis Swer, i kong Christina Sympli bad kiwei kiwei, kumjuh ruh la ïa don ryngkat lang u MLA ba rim ka Khliehriat, u bah Justine Dkhar, ar ngut ki MDC ka thaiñ, u bah Lasky Rymbai bad u bah Fineliness Bareh, ki khynnah skul , ki kmie ki kpa jong ki khynnah skul, bad ruh ki khynnah skul ba rim kiba pass na kane ka skul lem bad kiwei kwiei ki riew rangbah.
La pynbyrngia bad pynwandur ïa kane ka sngi ba kyrpang da ka jingrwai kyrpang (gospel Song) na u Rev.Brother Solomon Swer, uba dei u Principal jong ka Khliehriat Higher Secondary School, ki jingrwai ïa ka School Anthem bad jingshad tynrai na ki khynnah skul.
