Nongpoh, Naiwieng 01: Kumba la ioh lum jingtip halor ka jingwan shna surok ka sorkar Assam ïa ka surok sha u pud u sam ka jylla Meghalaya ba hap ha ka Shnong Bakhlapara hapoh ka Hima Nongspung ka dei kaba la pyrshah jur da ka Hima Nongpsung bad kynthup ruh wat ki seng bhalang, hynrei kumba long haduh mynta ka sorkar Assam lyngba u Contractor wat lada ka don ka jingpyrshah bad u Contractor u pyntreikam beit shaid shaid ban shna ïa katei ka surok ha kaba la jan dei sa tang ban siang rong noh ïa ka surok.
Kum ban pynkymmaw dang shen ka Hima Nongspung ryngkat ki seng bhalang ki la leit ban jurip ïa katei ka surok ban pyrshah halor ka jingwan tih ïa katei ka surok ba la hap sha u pud u sam ka jylla Meghalaya bad ruh ba ka Hima Nongspung ka la rai ban ujor sha ka KHADC bad ruh ban ujor da ka ejehar, hynrei haba phai pat halor ka jingpyntreikam ïa katei ka surok u Contractor um shem la sngap bad u la pyntrei beit ïa katei ka surok kaba wan na ki kam pynroi jong ka sorkar Assam lyngba ka tnad PWD.
Kane ka jingioh lum jingtip ba u Contractor na Assam u dang pynïaid shaid ban pyntrei ïa katei ka surok, ka dei ruh halor ka jingioh lum jingtip na u President ka KSU Western Border Area, u Samla Receive Pator bad kumba la pynpaw da utei u nongïalam la ong ba u Contractor u dang ïaid shaphrang beit ban pyntrei ïa katei ka surok bad mynta lei lei sa tang ban poi ka bynta ba un siang rong noh ïa katei ka surok.
Haba kren halor kane ka jingkynnoh ba wan shna surok jubor da ka Assam ïa katei ka surok ba hap ha ka Shnong Bakhlapara hapoh ka Hima Nongspung, u Syiem ka Hima Nongspung, u Paiem Patrick Syiemiong dang shen haba wan ban jurip ïa katei ka surok u la pynpaw ba ka Hima kan sa ujor sha ka KHADC bad ruh ban ujor da ka ejehar pyrshah ïa ka jingpyntrei ïa katei ka surok, hynrei kumba long haduh mynta pat u Contractor u dang pyntrei beit ïa katei ka surok kaba la dei ka por sa ba un siang rong ïa katei ka surok.
Halor kane ka jingbteng u Contractor ban pyntrei shaid shaid ïa katei ka surok, u Nongïalam ka KSU, u Samla Receive Pator, u la ong ba ka seng ka kwah ban tip ka la dep neem ban ujor da ka ejehar ne ka la dep neem ban ujor sha ka KHADC ban tuklar halor kane ka jingwan shna surok jubor sha u pud u sam ka Meghalaya bad kumba long mynta ka seng ka sngewkhia namar ba u Contractor u la pyntrei shaid shaid ïa ka kam kaba dang sah mynta sa tang ba un siang rong noh ïa katei ka surok.
Shuh shuh, u la pynpaw ruh da kaba ong, kumba ka Hima Nongspung lyngba u Syiem ka la pynpaw ba kan ujor ejehar pyrshah halor kane ka jingwan shna surok beain ka Assam bad ruh ban ujor sha ka KHADC ba kan tuklar halor kane ka jingwan shna surok ka Assam bad na ka liang ka seng ruh ka angnud ba ka Hima kan shim khia noh kham kloi namar kum ka seng ruh kam kwah ba katei ka jaka ba la wan siang rong da ka Assam kan leit sha ka jylla Assam katba ha ka jingshisha katei ka jaka ka hap ha ka Shnong Bakhlapara hapoh ka Hima Nongspung ha ka jylla Meghalaya, u la bynrap.
