Sa shisien mih surok ki nongïasaid aiñ ka jylla Meghalaya, dawa ban weng noh ïa u Amit Kumar

Shillong, Risaw 7: Ka jingïakhih jong ki nongïasaid aiñ ha Meghalaya ka la nangjur ha ka sngi Balang ha kaba da ki spah ngut ki nongïasaid aiñ ki la ïaid paidbah lyngba ka nongbah Shillong, da kaba kynnoh ba ka sorkar jylla ka la ïada ïa u Advocate General Amit Kumar u Amit Kumar wat hapdeng ka jingkular bunsien.
Ka jingïakhih, kaba la ïadon lang da ki kynhun jong jan baroh ki seng nongïasaid ain jong ki distrik, kane ka la jia shwa ka jingialang kaba la buh por bad u Myntri Rangbah ka Jylla ha ka 7 tarik u Risaw.
U Secretary General jong ka High Court Bar Association u Kishore Gautam u la ong ba ka Bar ka la shah pynbor ban leit biang sha surok namar ba u AG Amit Kumar u ïai bteng ban mih sha ki iing bishar hadien ba u CM u la pynthikna ba un ym leh kumta.
“Ngi la ïakhih la katto katne por.Phi tip ba ngi la don ka jingïalang bad u Myntri Rangbah ka Jylla.Sa shisien la ai jingkular ba u Amit Kumar un nym wan mih ha ka High Court ne ha kino kino ki ïingbishar ne ki tribunal ha Meghalaya, kumjuh ruh ïa ki nongïasaid aiñ kiba don ha Meghalaya.Hynrei hapdeng kata ka jinglong jingman, u Amit Kumar u la sdang ban mih ha baroh ki ïingbishar”, la ong u Gautam.
U la ong ba u la pyntip hi dalade ïa u Myntri Rangbah ka Jylla.
“Haba u wan mih kum kine, nga la pyntip sha u CM lyngba ka WhatsApp halor ki jingwanmih jong u namar ha ka jingïalang ba la dep u la ai ïa u number jong u bad ong lada don eiei phi lah ban ïakynduh ïa nga.Hynrei u dang wan mih man la ka sngi, ym tang ha High Court hynrei ha ki trial court ruh kumjuh,” u la ong.
“I kumba ka jingpynthikna jong ka sorkar kam don jingmut ei ei ïa u.Wat ki kyntien na u Myntri Rangbah ka Jylla ruh kim mut ei ei.Kumta ngi la shim ïa ka sienjam kaba tyngeh ban boycott ïa ki iingbishar bad mynta ka sngi ngi la don ïa kane ka jingialang paidbah”, la ong u Gautam.
U la ong ba ka jingpyni bor ka pynshisha ba ka jinglong tylli kawei ki nongsaid aiñ ka long kaba iatylli.
“Mynta ka sngi phi la ïohi ïa kaei kaba la jia.Shibun ki dkhot ki la don hangtei. Baroh ki ieng ha kajuh ka sur.Ka jingdawa jong ngi ka long kajuh – weng noh ïa u Amit Kumar”, u la ong.
“Ngim lah ban sngewthuh balei ba u Amit Kumar u long uba kongsan bha, ki jingkyrpad jong ngi, ki jingïalang jong ngi, ki jingpynpaw jong ngi – ym shym la jia ei ei kaba thikna haduh mynta,” ong u Gautam.
Halor ka jingpynthikna ba kam dei da ka jingthoh, u Gautam u la ong, “Kam dei da ka jingthoh hynrei haba ïadei bad u CM, ngi la pyrkhat ba ka jingkular jong u ka mut eiei, ngim dei ki nongshong shnong ba rit, ngi dei ki nongiasaid ain.Ngi la pyrkhat ba haduh ka 7tarik Risaw, u Amit Kumar un nym mih satia.Ha shwa jong u CM, ngi la ïa kynduh ruh ïa u Symbud Myntri Rangbah bad ngi ïoh ïa ka juh ka jingkular hynrei haduh mynta kam shym la jia eiei.”
Haba maham ia ka jingiakhih kaba kham jur, u la ong,”Ka jingialang mynta ka sngi ka long ban pyni ïa ka jingiatylli na ka bynta ka jingbha lang jong ka High Court Bar Association bad ka Shillong Bar Association.Ngi don baroh kawei ha kane. Ngin sa bteng da ki rukom ïakhih bapher bapher.Ngin sa don ka jingïalang jong ki EC jong ki seng nongbishar bapher bapher jong ki distrik bad ki High Court Bar Associations bad ngin sa shim ïa ka rai ïa kaei kaba ngin sa leh hadien.”