Mynta ka la kiew biang bad bunshah : Shah ktah jur kiba im na ka kam jngohkai pyrthei haba don ki jingkulmar ong u Conrad

Shillong, Risaw 07 : Ka kam jngohkai ha Meghalaya ka la sdang ban kiew biang suki suki hadien ba ka la shah ktah jur na ka jingkulmar kaba la jia ha ka 19 tarik Nailar mynta u snem, ong u Myntri Rangbah ka Jylla, u Conrad K. Sangma.
Katkum ka kyrwoh khubor, u Myntri Rangbah u la ong ba katei ka jingjia ka la ktah bha ïa ka kam jngohkai, ha kaba bun kiba la dep buh jaka sah lypa ha ki hotel bad kiwei ki jaka sah ki la hap ban sangeh ïa ki jingpynbeit jong ki.
Hynrei, u Myntri Rangbah u la ong ba ka jinglong ka kam jngohkai mynta ka la sdang ban wan phai biang, bad ka Sorkar ka dang shim ki sienjam ban pynskhem biang ïa ka jingshaniah jong ki briew ha Meghalaya, khamtam na bynta kito kiba wan jngohkai.
U la ong ruh ba ha kino kino ki jingjia ba don ki jingpynkulmar, ki nongshong shnong bad ki briew kiba im da ka kam jngohkai ki dei kiba shah ktah nyngkong eh.
“Ka jingpynkulmar kam pynbeit ïa kano kano ka jingeh bad kam ïarap ïano ïano,” u la ong ha ka jingpyllait khubor.
U Conrad u la kyntu ïa baroh ki seng bad ki kynhun kiba don ïa ki mat ban pynpaw ïa ki jingeh jong ki lyngba ki lad kiba jai jai bad da ki rukom kiba ïaid katkum ka lynti kaba dei, khnang ba kine ki mat kin lah ban ïoh ïa ka jubab kaba dei.
U la ong ba ka jingpynkulmar kan nang ktah shuh shuh ïa ka ïoh ka kot, khamtam ïa ka kam jngohkai, kaba khatduh kan ktah biang ïa ki paidbah jong ka Jylla.
U Myntri Rangbah u la ong ba ka Sorkar ka dang ïatreilang ban pynlong biang ïa Meghalaya ka Jylla kaba shngaiñ bad ban pynïoh biang ïa ka jingshaniah jong ki nongjngohkai.