Nongstoiñ, Naiwieng 1: Ka jylla Meghalaya ka la kynjoh sanphew snem tam naduh ba la ioh ia la ka jong ka jylla, lyngba ka jingialeh kaba la ialam da u (L) bah Hopingstone Lyngdoh bad hapoh ka jingialam jong u, ki la don haduh laispah ngut tam ki Volunteer kiba ba la iasnohkti lang bad kiba la shah kem ha ka por ba la pynlong ia ka jingiakhih bad kiba la shah set phatok.
U bah Ospear Lyngdoh haba pyntip ha u nongthoh khubor, u la ong ba shuwa ba ka jylla kan rakhe ia ka Jubilli ksiar jong ka jingdap sanphew snem, ka HSPDP ka la lum thup ia baroh ki kyrteng jong ki volunteer kiba la shah set phatok bad ki don katto katne ngut ki volunteer kiba la pyrshang ban lum thup ia ki kyrteng jong ki volunteer kiba dei tang na West Khasi Hills, ha kaba haduh mynta la ioh ban lum tang hynriew phew hynñiew ngut ki kyrteng jong ki volunteer kiba la shah set phatok ha ka por ba ki iakhih ban dawa ia ka jylla ba pura.
U la ong ruh ba katei ka kynhun jong ki hynriew phew hynñiew ngut ki volunteer kiba la shah set phatok ki la iakut ba baroh kiba dang im kin pynlong ka jingiakynduh lang ha shuwa ban kut une u snem hynrei ia ka tarik kin sa pyntip kham hadien.
U la ong ruh ba na pdeng ki hynriew phew hynñiew ngut ki volunteer ki lah ban don kiba la khlad noh, hynrei ka jingpyntip kan long kyllum lang ia baroh namar ki lah ban don kiba haiing ha sem kiba kwah ban iadon ryngkat.
Lada don kino kino ki rangbah na West Khasi Hills kiba ym shym la ioh ia ki kyrteng jong ki, hynrei kiba kynmaw ba ki la shah set phatok ha ka por ba ki iakhih dawa hill state, kin sngewbha ban pyntip ha u 8787412552, khnang ba yn ioh ban pynrung ia ki kyrteng jong ki ha katei ka thup kyrteng jong kiba la shah set phatok na ka daw jong ka jingdawa jylla ba pura.
