Lap ba dang bun bah ki jingduna ha ka Civil Hospital, shen yn rah hakhmat ka Myntri ba dei peit: HYC

Mawkyrwat, ‘Naiwieng 01: Ka Hynñiewtrep Youth’s Council (HYC) jong ka Mawkyrwat Circle ha ka jingleit ban jurip ïa ka jaka sumar ha Civil Hospital, Mawkyrwat ka la lap shibun ban ki jingduna bad ki jingbymbiang na ka bynta ki donkam jong ki paidbah kiba wan shah sumar ne kiba wan wad ki lad jingsumar.
Kumta ka Hynñiewtrep Youth’s Council (HYC) jong ka Mawkyrwat Circle hapoh ka jingïalam jong u Wallambor Nongsiej, President hadien ba ki la ïoh jingujor na ki paidbah ha kaba ïa dei bad ka jingbym biang ki doktor bad ka jingbym kheiñ snep jong kiba don ha Emergency Room ïa ki nongwan thiah pang, ha ka 31 tarik u Risaw, 2023 ki la hiar ban leit ïa kynduh ïa u Medical Superintendent jong ka Civil Hospital Mawkyrwat, u Dr. W. Sutnga ban ïa kren halor ki mat ba donkam.
Ha kane ka jingleit ban ïa kynduh ïa u Medical Superintendent, ka HYC ka la ïoh ban ïa phylliew jingmut ïa shibun bah ki kam bad ki jingduna jong kane ka jaka sumar kata kaba long naduh ki doktor, ki ki staff nurse, ki nongtrei jong kane ka jaka namar kim pat da biang lut.
U bah Wallambor Nongsiej, President ka Hynñiewtrep Youths’ Council (HYC) jong ka Mawkyrwat Circle hadien ka jingïakynduh ïa u Medical Superintendent haba kren ha ki lad pathai khubor u la ong ka leit ïa kynduh ïa u, ka dei hadien ba ka la ïoh shibun ki jingujor na kiba bun ki paidbah kiba wan shim dawai napoh ka Civil Hospital, Mawkyrwat ha kaba ïa dei bad ka jingduna ïa ki jingtreikam hapoh kane ka jaka sumar. Shuh shuh u la ong ruh ba ha ka jingleit ban ïa kynduh ïa u Medical Superintendent (MS) u la ïathuh ba ki dang don shibun ki jingduna ha kane ka jaka sumar kata ba katkum ka jingdon ki doktor la kumno kumno ki dei ban don haduh 33 ngut hynrei haduh mynta pat ki dang duna ïa kata tang 8 ngut.
U la ïathuh shuh shuh ba ha kaba ïa dei bad kawei na ki jaka sumar ka Pediatrics Ward kaba la dep ban buh ha u Ïaïong, 2023 hynrei haduh mynta kane ka jaka sumar kam shym pat la treikam ha ka rukom kaba dei, kumta u la buh ka jingkyrpad ïa u MS ba kum khliehduh jong kane ka Civil Hospital u dei thaw ki lad ki lynti ban pyntreikam noh khnang ba kan lah ban ai shibun ki jingmyntoi ïa kiba donkam ka jingïarap.
Ha kawei pat ka liang, u la ong ruh ba katkum ka jingpeit jong ka HYC, ka jingtreikam ha kane ka Civil Hospital haduh mynta ka dang long tang 30% na ka 100%. Namarkata, ki la buh ka jingkyrpad ïa ki Nongmihkhmat jong ka South West Khasi Hills District ba naduh ba la plie ïa kane ka jaka sumar la lap ba shibun bah ki jingduna ki don ha ka bad la shu plie khlem da don ïa kita ki jingdonkam kiba katkum ka jingdon ïa ka jaka sumar, kham kyrpang eh ban pynbiang ïa ki doktor bad ba kin shimkhia ruh ïa kane ka kam namar ka dei ka jaka ai jingsumar ïa ki paid nongshong shnong jong ka South West Khasi Hills District bad ka ban lah ban ai ka jingshakri kaba bha.
U la ong ruh ba ym tang kata, kum ka seng ka don ruh ka jingthmu ba halor ki jingduna ïa kaba kum ka seng ka la lap, kin sa leit ban rah ruh hakhmat ka Myntri ba dei peit ïa ka tnad ka koit ka khiah, ka kong Ampareen Lyngdoh khnang ba ma ka ruh ka sa shimkhia.
Ha kane ka sngi la donlang ruh u Education Secretary jong ka HYC, South West Khasi Hills District, u Pynskhem Nongsiej lem bad kiwei de ki para dkhot jong ka seng.