Ki khusnam bakynsai ïa u Bah Tanbor Swer, Bah Daminot Wankhar bad Kong Adlyne Khonglam

Shillong, Naitung, 15: La pynkup burom da ka Khusnam ba kynsai ïa ki laingut ki khlur tiewdohmaw jong ka jylla, ba la pynbeit da ka Anuprerona, Riti Academy bad Media Plus ha Soso Tham Auditorium, State Central Library, Shillong ha ka sngi Saitjaiñ bad kynthup ruh ïa ki phra ngut ki khlur na jylla Assam.
Ha kane ka jingpynkup burom la sakhi lang da u Myntri ka Sorkar Jylla u Bah Paul Lyngdoh uba la ïaroh ïa ki synjuk ba la pynlong ïa kane ka kam kaba dei ban pyrto ïa u synñiang jong ki riewtbit kiba ka imlang sahlang kam da kynmaw shuh.
U Bah Paul u la kren bun kiei kiei kiba dei ban kyntiew ïa ka mattithaw ha jylla, da ka ba buhti da ki Khusnam ba kyrpang na ka bynta ka mattithaw bad ba la pynkylla kyrteng noh ïa ka SICPAC sha ka shlem Lariti.
La pynkynmaw ruh ïa ki por khynnah ha kaba u Bah Paul Lyngdoh u ju kyndeh ban sngap ïa ki jingrwai jong u Bah Tanbor, bad hadien kum u samla nongïalam KSU u la kynmaw tympang ïa u Bah Daminot J Wankhar bad Kong Adlyne Khonglam ki ba la rwai ha ka thuip jingrwai jong ka seng, bad mynta ka kynti ki la ïoh ka khusnam.
La pynkup ïa u Bah Tanbor Swer da ka Khusnam Rana Kharkongor bad da ka Khusnam Riti ïa u Bah Daminot J Wankhar bad Kong Adlyne Khonglam, bad kiwei kiwei ki ba la shah pynkup burom na Assam da ka Khusnam Media Plus, ki ba kynthup ïa u Dr. Naren Hazarika, Sr. Journalist, Editor of Daily Daindeen Barta, Nang Anjana Gogoi, Advisor ka Dauboria Barta, Mr. Sukleswar Nath, Smt. Ushamoni Saikia, Smt. Alaka Bujar Baruah, School Teacher, Smt. Manju Hazarika, school teacher, bad Smt. Inu Sarma, Mr. Sajan Bhuyan.
Ki kaitor bad duhalia ba la rwai ki sur bathiang ha kane ka sngi ki long ka kynhun thymmai ba la jer Na U Bnai, ka Saphina Kharhunai bad Aanya Kharhunai, ki ksiew jong u Bah Rana Kharkongor, bad ki sur tympang jong u Bah Tanbor Swer bad Kong Adlyne Khonglam. Ki kynhun shad na jylla Assam ruh ki la ai ki jingshad tynrai ki ba iphuh iphieng kynthup ïa ka shad tynrai Bihu, ka ba la pawnam kylleng.
Kum ban ïai kynmaw ïa u synñiang jong kita ki laingut ki khlur tiewdohmaw, la pyrto da ki kyntien shongsbai kumba la jer ainam kyrpang: Bah Tanbor Swer, phi dei u myllung thaw kyntien bad sur rwai Khasi tynrai bad ba mynta. Ha ka kam ba shitrhem jongphi ba la palat sanphew snem, la mih byllai ki sur rwai halor ka mariang, ki samla, ka longbriew manbriew, ka mynsiem ieitri, sur riewblei bad ka jingim briew ha imlang sahlang. U Bah Tanbor u dei u kaitor ba la ithuh da ka shlem iktiar jong ka All India Radio bad la pynmih katto katne ki thup jingrwai, kynthup ruh ka ba rwai byrngia ha rynsan paidbah ba kongsan ha jylla bad ha ka thaiñ. La pyrto ainam ïa u synñiang bakhraw ha ka liang ka sur rwai sur tem Khasi, da ki synrop riewtbit mattithaw ki ba thrang ban pynkup burom ïa phi, da ka Khusnam Sahkynmaw ha ka nam ka kyrteng jong U Bah Rana Kharkongor 2023
Bah Daminot J Wankhar, phi dei u simpah simsong, u kaitor bad duhalia ba kynsai ha la ka jingtbit bad ki sur snah ba khia thew. Ki tien danda bad kyoh mynthi ha ki kyntien sur rwai ki long ki ba synlar, ba mynta bad ba ïahap tar bad ïadei dur lyngba ki por bad katto katne na ki jingrwai ki la ai mynsiem ban pynkylla dur bad kyntur shaphrang ka mynsiem saiñkylla ha ka imlang sahlang ha ka ba lah ban ñiew kum ki sur rwai suhsieng shi ryta. U myllung ba ju rwai bad thoh ha jylli riewpyrthei bad riewblei, la ha ka ktien tynrai Khasi bad ktien phareng; u Bah Daminot u dei u radbah damdar bad kaitor ba tyngshaiñ pura. La pyrto ainam ïa u synñiang bakhraw ha ka liang ka pule dangle, ka thoh ka tar bad ka surrwai surtem, da ki synrop riewtbit mattithaw ki ba thrang ban pynkup burom ïaphi, da Ka Khusnam Kynsai Kordor 2023.
Kong Adlyne Khonglam, phi dei ka myllung, kaitor bad duhalia kynthei da ka surthiang snah ba kyndeh mynsiem bad shitrhem ha ki paidbah da ki sur bad kyntien shaphang ka jingim nongkyndong, ka sur tlem ha kut shadem bad ki sur baphuh baphieng ha ka imlang sahlang. Kum ka myllung, phi la thoh kot bad dei ka kaitor ba la ithuh da ka shlem iktiar jong ka All India Radio bad Doordarshan Kendra. La pyrto ainam ïa u synñiang bakhraw ha ka liang ka sur rwai sur tem Khasi, da ki synrop riewtbit mattithaw ki ba thrang ban pynkup burom ïa phi, da Ka Khusnam Kynsai Kordor 2023.