Ban jied ïa ki nongkitkam ka UDP ka shong ha ka rai jong ka Nomination Committee: Paul

Shillong, Naitung 15 : U Working President ka UDP uba dei ruh u Myntri jongka sorkar u bah Paul Lyngdoh u la ong ba ka jingjied ïa u President bad ki nongkitkam ba thymmai jong ka Party ka shong ha ka rai jongka Nomination Committee.
“ Hooid ka don ka khep ba ailad ban ïakhun hynrei ka don ka Nomination Committee bad ka shong ha kane ka committee ban phah ïa ki kyrteng jong ki kam bapher bapher hapoh ka party kynthup ïa u President. Kumta ka shong beit nadong shadong ha ka Committee” ong u bah Paul.
Lah ban pynkynmaw ba ka General Council jongka UDP kan long ha ka 29 tarik mynta u bnai Naitung.
Dang shen u General Secretary ka UDP u bah Jemino Mawthoh u la ong ba ka don ka jingsngew jong kiba bun balang hapoh ka party ba une u President ba mynta u bah Metbah Lyngdoh un dang ïai bteng kum u President ka Party.
U bah Mawthoh u la ong “ Ym lah ban len, u bah Metbah u la lah shisha ban ïalam ïa ka party bad kumta ngi dang don beit ka jingshaniah ha u”.
U la ong shuh shuh u bah Metabah kum u nongïalam u la lah ban nang kyntiew bad pynkhlaiñ ïa ka party namar kum ka party ka la nang kiew ka jingbun paid ki MLA jongka na ka 6 ngut ha u 2018 sha ka 12 ngut ha u 2023 bad nalor kata ka don 10 ngut ki MDC ha KHADC bad 7 ngut ha JHADC.
Nalor kata hapoh ka jingïalam jongu ka Party ka la lah ban ïatrei lang ha ka sorkar ban wanrah ïa ka sorkar kaba skhem bad neh beit haduh ba kut ka samoi san snem bad ym tang katta hynrei wat ha ki District Council ruh.