Da ki nongkren ba shemphang wanrah ka NPP Shillong North ha sngi pynkup burom ïa ki samla ba pass bha

By Mawphor News Desk On Jul 16, 2023

Shillong, Naitung 15 : Kum shi bynta ban ai mynsiem ïa ki samla kiba la pass bha ha ka eksam SSLC bad HSSLC, na ka liang ka National People Youth Front bad ka NPP Women Wing’s jong ka North Shillong Constituency ha ryngkat ka jingïatreilang bad ka Life Focus Society ka la pynlong ïa ka jingpynkup burom kaba shongkun bha ha kane ka sngi Saitjain.
Kitei ki samla ba shah pynkup burom ha katei ka sngi ki kynthup ïa u Tanushri Acharjee uba la poi ha ka kyrdan kaba lai bad ka Isabella Mawlong kaba la poi ha ka kyrdan kaba kaba 10 ha ka eksam SSLC. Katba u samla Rishab Purkayastha udei uba la ïoh ïa ka kyrdan banyngkong eh ha ka eksam HSSLC, Commerce Stream bad u samla Sangam Poul uba la ïoh rung ha ka kyrdan kaba phra ha ka eksam HSSLC Science Stream.
Na ka liang ki bor pynïaid ki la wallam ruh arngut ki nongkren ba shemphang ban pynshai bad pynsngewthuh ïa ki samla ka constitutency kumno ba kin lah ban jam shakhmat ha ka jingim jong ki. Kitei ki arngut ki kynthup ïa ka Lynett Johnson na ka Communication and training jong ka Life Focus Society bad ruh u Chef Tenzing Tsering, u nongshet uba la pawnam ym tangha India hynrei ha ka pyrthei baroh kawei.
Shwa kane, na ka liang u Bah Ransom Sutnga, President ka NPP Shillong North u la ong ba ka jingpynlong ïa katei ka lympung pynkup burom ka long ban ai ka jingithuh ïa ki samla kiba la trei minot ha ki jingpule jong ki ha ka eksam SSLC bad kumjuh ruh ha ka HSSLC. Nalorkata, u ong ruh ba kane kan ai mynsiem bad pynshlur wat ïa kiwei kiba khlem lah ban poi kham shakhmat ba kin lah ban ïakhun tyngeh ha ka eksam ban sa wan khnang ban ïoh lang ïa katei ka khusnam ha u snem ban wan.
U Bah Ransom u la ong ruh ba watla ki khlem poi sha ka thong ha ka jingïakhun ba la dep hynrei kane ka la ai mynsiem ïa ki kum ka party ba kin ïai bteng ban trei khlem sangeh naka bynta ban pyntylli shuh shuh ïa ka kynhun kaba ki don.
“Mynta ka sngi ki nongïalam jongka party naman ki unit ki poi lut da ka jingïatylli,” u la bynrap shuh shuh. Ha kajuh ka por haba pynshai pat halor ka jingwan ïalam ïa kitei ki nongkren ba shemphang, utei u President u la ong ba u kwah ba ki samla ka constituency kin ïoh ïa ka lad ban ïohsngew ïa ki nongkren kiba tbit kiba lah ban wanrah ïa ka jingkylla ha ka rukom pyrkhat jong ki ha ka jingim kaba man ka sngi.
Ka la don ruh ka jingïaphylliew jingmut bad ka jingjubab ïa ka jingkylli na ki samla ïa kaba ka jubab la ai da u Tejdor Tiewsoh, SAIACS Bengaluru, Lynette Johnsoh LSF bad ruh na u Bah Ransom ba dei u dkhot ka Board of Directors LFS.
La ïoh ruh ïa ka jingkren na u Prof Don War, Vice President ka State NPP bad ruh na ka Kong Eldora B Lyngdoh, President NPP Women’s Wing nalor ka jingdonlang ki nongïalam ba hakhmat jong ka State National People’s Youth Front, kumjuh ruh na ka Women’s Wing.