Khur takma ka Meghalaya na ka National Games lyngba u samla Pynshngaiñ Kurbah

0

Shillong, Rymphang 04 : Kadei hadien ka jingïai ap khmih lynti kaba la bun bun snem, khatduh ka Meghalaya ka la ïoh ban khur takma na ka lympung ïalehkai kaba heh tam ha ka Ri, ka National Games kaba dang ïaid mynta ha ka jylla Uttarakhand.
Ïa kane ka takma rnong la ïoh ban khur da u samla Pynshngaiñ Kurbah uba la ïoh ruh ban thaw histori ban kylla long u nongïalehkai king lieng (canoe) u ba nyngkong eh na ka Jylla ban khur takma ha ka 38th National Games.
Kumta, na ka liang u Secretary ka Meghalaya State Olympic Association (MSOA) Bah Finely Pariat u ai ka jingïaroh ïa ka kynhun jong u Vincent bad Sheila kiba la trei borbah ban rah ïa ka nam jong ka Jylla ha katei ka lympung ïalehkai kaba heh tam ha ka ri kaba wan aireng bad shim bynta da ki nongïalehkai kiba tbit tam na ki jylla bapher bapher.
Kumban shu pynkynmaw hangne ba ka Jylla ka la phah bun ngut ki nongïalehkai ban leit shim bynta ha katei ka National Games kata naduh ka Shooting, Athletics, Judo, Archery, Rowing, Wushu, Aquatics, Canoeing & Kayaking bad ka Boxing.

Leave A Reply

Your email address will not be published.