Shillong, Rymphang 04 : Ka Nongrim Hills SC bad ka Laitkor SC ki la ïoh bun tylli bha ki kabu ksiar ha ka lympung ïalehkai jong ka OC Blue Shillong Premier League 2024 ha kane ka sngi Ba-ar hynrei ka jingïakhun pat ka la kut noh ha pdeng madan khlem da don mano mano ruh ba ïoh ban thep kol ha ka jingïakhun kaba itynnad bha ha madan SSA Stadium, Polo.
Watlabaroh arliang kim kwah ban mad ïa ka nam ïakhaid hynrei tad haduh ban da put pynwai ïa ka jingïakhun ym shym la don satia ba ïoh ban thep kol kata ruh wat hadien ba la kut ka por ba la pynjlan.
Da kane ka result ka pynlong mynta ïa ka Laitkor ban don biang ha ka kyrdan kaba saw ha ka miej khein point.
Mynta ka don da ki 17 point kaba long mar katjuh ka jingïoh kamai point bad ka Langsning FC hynrei ka ïapher bad ka jingïoh thep kol (kaba long da +1 la -6). Haba phai pat sha ka Nongrim Hills, kane ka kynhun kaneh hajuh ha ka kyrdan kaba hynniew da ki 14 point.
Haba phai sha ka jingïakhun, ka Laitkor ka la kham ïoh mynsiem da ka jingwan pynshngain bun ki nongkyrshan ban kynhoi ban risa. Ym tang katta ka la ïoh run bun ki kabu ksiar ha ka kylla step hynrei kam shym la lah satia ban pynkhih jar.
Tang na u Caldolan Kharmawphlang marwei u la ïoh haduh lai tylli ki kabu ksiar ban pynkhih jar hynrei u khlem lah satia.
Ka jingïakhun ha kane ka sngi Balang pat kan long hapdeng ka Nongthymmai Sports Club pyrshah ïa ka Shillong Lajong FC ha ka por 2:30 baje janmiet. Ha ka kylla kaba nyngkong, ka Lajong ka la pynliem haduh 6-1 kol ïa ka Nongthymmai SC.
