Shillong, Naiwieng 22: Lai tylli ki kynhun, ba kynthup ïa ka Mawkhar, Pohkseh bad ka Mylliem ki la khur jingjop ha ki jingïalehkai ka lympung First Division Football League 2024 jong ka Shillong Sports Association ba la long hynne ka sngi Thohdieng (22.11.2024) ha madan SSA, Polo.
Na ka liang jong ka Mawkhar SC ka la lah ban pynliem da 4 – 3 kol ïa ka Sohryngkham SC ha ka jingïalehkai kaba itynnat bha, nangta ka Pohkseh SC ka la jop ïa ka Lawsohtun SC da 1 – 2 kol, katba ka Mylliem SC ka la jop da tang 1 kol ïa ka Mawtawar SC.
Ha ka jingïalehkai kaba nyngkong, ka Mawkhar ka la hap ban wanphai ar sien nadien naba ka Sohryngkham SC ka la ïoh ban tam shuwa haduh 2 kol tang mar shiteng ba la ïaid ka kylla step lyngba ka kol na u Bikitstar Nongkhlaw (21min) bad u Wallambha Kharpran (26min).
Ka Mawkhar SC ka la ïoh ba kan pynphai shi kol ha ka 29 minit lyngba u Refferfield Ryntathiang bad pynïakhaid lyngba u Edmundwell Mukhim (65min) ha ka kylla miet.
Ka Sohryngkham ka la ïoh biang ba kan lamkhmat ïa ka jingïalehkai lyngba ka kol na u Pynshongdor Pyngrope ha ka 67 minit.
Hynrei ka Mawkhar ka la lah ban wanphai biang da kaba pynïakhaid lynba u Baniimen Passah (77 min’) shuwa ba u Refferfield Ryntathiang un pynkhih ïa ka kol pynjop ha ka 86 minit.
Haba ka jingïalehkai kaba bud, ki ar kol ha ka kylla step ki la biang pura ïa ka Pohkseh ban pynliem ïa ka Lawsohtun da 2-1 kol. Kine ki ar kol ka Pohkseh la kum bakla thep da u Blashan Nongkynrih (5 min) bad ha ka 9 minit na u Reinjoywell Wartde. Ka Lawsohtun ka la ïoh ban pynphai kawei na u Rishankhem Nongkynrih (51min).
Katba ha ka jingïakhun kaba lai, ka shi kol jong u Shembhalang Langbnang (45 min) ka la biang ïa ka Mylliem SC ba kan pynliem ïa ka Mawtawar SC.
