Khliehriat, Naiwieng 22: Ka Dhana SC bad ka Thangskai Tiger SC ki la khur jingjop ha ki jingïalehkai ka lympung phutbol kyrdan Super Division Football Tournament-2024 kaba la tip kum ka 4th Kyrmen Shylla Contribution Trophy ba la pynïaid da ka East Jaiñtia Hills District Football Association (EJHDFA) kaba la long ha ka sngi Thohdieng (22 tarik u Naiwieng), 2024 ha madan EJDSA Artificial Turf, Diengshynrum, Khliehriat.
Haba phai sha ka jingïakhun kaba nyngkong, na ka liang jong ka Dhana SC kala lah ban pynliem noh da 2-0 kol ïa ka Khliehriat West YWSC. Baroh ar tylli ki kol ki la wan ha ka kylla step, ha kaba u Phon Khaii u la thep ïa ka kol kaba nyngkong ha ka minit ba 13 bad nangta bud sa ka kol na u Marki Swer haka 26 minit.
Katba haka jingïakhun kaba ar la sakhi ïa ka Thangskai Tiger SC kaba la pynliem noh da 3-2 kol ïa ka Chiehruphi SYWSC. U Pynthymme Rymbai (22 & 25-Penalty) jong ka Thangskai Tiger SC u la ïoh ban pynkhihjar ar kol, bad kawei ka la wan na u Verdy Nongtdu haka minit ba 90+1. Katba ki kol naka Chiehruphi SYWSC la kum bakla thep hi kawei da u Mankhih Rymbai (18 own goal) bad kawei pat na u Sandi Kasar haka minit ba 29 (Penalty).
La pyntip ba ka jingïalehkai ha kane ka lympung kan wanphai biang ha ka 25 tarik u Naiwieng (Lah Sngi U Blei) ha kaba ka Sutnga SSCC kan ïakhun pyrshah ïa ka Khliehriat West YWSC haka por 11:45 am, katba ka R.Iawpynsing SC pyrshah ïa ka Dhana SC haka por 2:15 pm.
