Cooch Behar Trophy: Watla dang neh ka M’laya ha ka tied, nangjan ka Delhi ban khur ïa ka jingjop

Shillong, Naiwieng 22: Ki rangtied ka Meghalaya ki la lah ban shan tyngeh ha ka sngi Thohdieng kaba la pynthikna ba ka jingïalehkai U-19 jong ki shynrang jong ka Cooch Behar Trophy Elite Group A pyrshah ïa ka Delhi kan jam sha ka sngi kaba saw bad kaba khatduh mynta ka sngi ha madan kriket jong ka MCA ha Polo.
Haba shimti ban tied ïa ka kylla kaba ar (2nd inning) ha ka sngi kaba lai ka kynhun jong ka Meghalaya ka la lah ba kan kamai 141 ron bad hap noh 5 wiket, bad ka dang sahdien sa 222 ron hadien ba ka Delhi kaba dang lamkhmat bad bat hi ïa u shabi na bynta kane ka jingïakhun, ka la lah ba kan buh ïa ka thong haduh 623/5.
U Manthan Dey uba kamai 34 ron na ki 106 bol bad u Gaurav Narleng u la kamai 30 ron na ki 106 ron ki la paw ba ki long kiba kongsan ban shan skhem ïa ka Meghalaya ha ka tied jan baroh shi sngi. Ka jingshah pynkhyllem noh u Gaurav, uba la kamai 95 ron ha ka inning ba nyngkong, ka la long ka jingduhnong kaba khraw ïa ka kynhun.
U Heiyomiki Ryngkhlem u la hap ban shongthait shiteng por namar ba u la mynsaw hadien ba ka bol ka la sangah ïa ka jingda khlieh (helmet) na ka bol ba la kawang da u Udhav Mohan (3/45) hynrei la kyrmen ba un sa lah ban sdang biang ïa ka jingïalehkai jong u mynta ka sngi lada u dang shah khot ban lehkai.
Ha kaba kut jong ka jingïalehkai, ka Meghalaya ka la ïoh ïa u Kshitij Singhania (6), uba la kamai 62 ron ha ka pali tied ba nyngkong (1st inning), da kaba tied ryngkatlang bad u Shavian Blah (14’). Ryngkatlang ki la pyndonkam 81 tylli ki bol, da kaba khanglad ïa baroh ki jingpyrshang jong ka Delhi, bad ka jylla kan kyrmen ba kan ïalehkai bha mynta ka samoi.
Shwa kane, haba sdang biang na ka 468/2, ka Delhi ka la kamai biang sa 155 ron shwa ban pynkut ïa ka inning ba nyngkong. U Dhanya Nakra u bym shym la khyllem na ka 98 ron, u la ïoh ban kynjoh ïa ka spah ron shwa ba un shah pynhap naba shu kem ïa ka bol ha u Heiyomiki lyngba ka bol u Angkit Tamang (1/122 na ki 23 obar) na ka bynta 130 ron. Dei tang u kapten jong ka Delhi u Mohak Kumar u ba la duh ban kam ron bun ïa ka kynhun hadien ba shah pynhap na ka rai LBW da u Salchang M Marak (1/87 ha ki 20) na ka bynta tang 1 ron.
Hynrei na kine baroh, u Aaryavir Sehwag u la long u namtam, u ba la bteng na ka 200 ron, u la nang kyntiew ïa ka jingkheiñ kaba heh jong u shuwa ban shah pynkhyllem noh ha u Rudra Singh Rathore (2/43 na ki 8.2) hadien ba kamai 297 ron. Kane ka inning kaba seisoh jong u Aaryavir ka kynthup ïa 51 tylli ki four bad lai tylli ki six.