Shillong, Lber 23: U MLA bad MDC jong ka Mawhati Constituency u Bah Charles Marngar ha ka sngi Palei u la aiti da ka dorkhas sha u Chief Executive Member (CEM) jong ka Khasi Hills Autonomous District Council (KHADC) u Bah Titostarwell Chyne ban kyntu ïa ka Council ba kan ïakren bad ki bor synshar jong ka Karbi Anglong Autonomous Council (KAAC) halor ka jingaibor ïa ki riewshimet ban khrong khajna haduh 15 hajar tyngka na ki kali kit synsar jong ki nongrep kiba sah ha ki shnong khappud jong ka Meghalaya bad Assam kiba hap ha thain Block-II
Haba kren sha ki lad pathai khubor u Bah Charles Marngar u la ïathuh ba ki briew kiba la aibor da ka Karbi Anglong Autonomous Council ki la khrong khajna 8 tyngka shi kilo ïa u synsar bad haba kheiñ lang ka la poi haduh 15 hajar tyngka shi kali Mahindra Pickup kat haduh ba ka la buh jingeh ïa ki nongrep jong ka thain Block-II kaba dang hap hapoh ka Mawhati Constituency.
U Bah Charles u la ong, “Ka KAAC ka la buh ïa ka khyrdop khrong khajna jong ka ha Jatalong, Madan Umwang, Sabuda, Umlaper, Mawsaladiang bad kane ka jingdon kine ki khyrdop lum khajna ka la pynkordit ïa ki paidbah bad nga la kyntu ïa u CEm ba un shimkhia halor kane ka mat.”
Ha kaba ïadei bad kane u Bah Charles u la ïathuh ba u Bah Titos u la kular ba un sa ïakren mardor bad u Chief Executive Member jong ka Karbi Anglong Autonomous Council ban pynsangeh noh mardor ïa kane ka jingkhrong khajna na ki nongrep ha kane ka thaiñ.
