Ha ka jingïapynbeit pud ha ka wat baar, dawa ka CoRP ba ka sorkar ba dei ban bishar bniah ïa ka Nongwah Mawtamur

Nongpoh, Lber 23: Ka Confederation of Ri Bhoi People (CoRP)haba leit ban jurip mynta ka sngi ïa ka shnong Nongwah Mawtamur ba hap ha Jirang Constituency ha Ri Bhoi District, ka la dawa mardor ïa ka sorkar jylla ba ka dei ban da bishar bniah shuwa ïa kot ki sla bad na ki paidbah shuwa ban shim ïa ka rai ha ka jingpynbeit pud ha ka wat kaba ar hapeng ka sorkar Assam bad Meghalaya.
Ka Confederation of Ri Bhoi People ka la hiar jurip ruh sha katei ka shnong Nongwah Mawtamur, ka dei halor ka nongrim ba ka Assam ka la kam ba katei ka Nongwah Mawtamur bad kiwei ki shnong ba marjan ka la hap sha Assam, hynrei katba ki paidbah nongshong shnong pat ki angnud ban don sha Meghalaya bad ki don ruh ïa ki dulir jaka kaba dei naduh u snem 1967 ba ki la register ïa ki jaka puta hapoh ka Hima Sohiong.
Haba ïa kren bad ki lad pathai khubor, u President ka CoRP, u Bah Bandari Ryntathiang, u la ong ba kum ka seng ka la hiar jurip sha kitei ki shnong khappud ba hap ha ka Jirang Constituency, ka dei ruh halor ka nongrim ba bun ki paidbah ki thrang ban don beit sha ka jylla Meghalaya bad kumba la lap ne kynduh ïa ki nongïalam shnong la paw shai ba katei ka shnong Nongwah Mawtamur ka dei sha ka jylla Meghalaya.
U la ong ruh kumba la pynpaw da ki paidbah nongshong shnong bad ki nongïalam shnong na ka por sha ka por ki pyrshah ïa ka sorkar Assam ban wan kyntur pud sha katei ka thaiñ, hynrei kum ki paidbah kim lah ban leh ei ei namar ba tlot palat ka sorkar Meghalaya bad ka KHADC kiba ym don mon ban ïada ïa ka khyndew ka shyiap.
U la ïathuh ba ki paidbah ki syier thod thod ban shah pynhap sha Assam ha kane ka jingpynbeit pud ha ka wat ka baar bad kumba la pynpaw da ki paidbah ba kim kwah satia ban leit sha Assam, namar lada khein katkum ki kot ki sla ne ki sakhi ki dei hi kiba dang hap ha ka jylla Meghalaya ym sha ka jylla Assam.
Namarkata, na ka liang ka seng ka dawa jur ïa ka sorkar Meghalaya ba kam dei ban rai kyrkieh ha kane ka jingïapynbeit pud bad shuwa ban shim ïa ka rai ka dei ban da bishar ïa ki kot ki sla bad ka dei ruh ban kynduh ïa ki padibah lane ban sngap ïa ka sur jong ki paidbah bad kum ka seng ka don ban kyrshan ïa ki paidbah ba ka Shnong Nongwah Mawtamur bad kiwei ki shnong da lei lei kim dei ban shah pynhap sha ka jylla Assam, u la bynrap.
Ha katei ka sngi ba la hiar jurip da ki nongïalam seng la sakhi lang ruh da ka jingdon ryngkat ki nongïalam shnong ba kynthup ïa u Bah Youthful Lapang, Sordar Shnong barim, Rangbah Shnong Nongwah Mawtamur, Bah Donkupar Wahlang, u bah Dwen Lyngdoh bad kiwei kiwei ki nongïalam Shnong bad ki riew rangbah ka shnong Nongwah Mawtamur.