Shillong, Lber 23 : U Myntri Rangbah ka Jylla Conrad K Sangma hynne ka sngi Palei, ula pyntip ha ïingdorbar Thaw Aiñ ba ka Sorkar ka dang ïakren bad ka Airport Authority of India (AAI) lem bad kiwei ki Agency ban pynjlan ïa ka runway (lynti hiar bad her liengsuiñ) ba mynta jong ka Kad Liengsuin Shillong kaba ha Umroi khnang ban lah hiar ki Liengsuiñ kiba kham heh.
“Kane kan plie lynti ïa ka jingpynïasoh liengsuiñ sha ki sorbah kum ka Mumbai, Bengaluru, Hyderabad bad Chennai ,bad ka jingkyntiew ïa ka jingwan ki nongshangkai” ong u Conrad ha ka jingkren halor ka mang tyngka.
Ka Kad Liengsuin Shillong kaba ha Umroi ka dei kaba la treikam pura ha u snem 2018 bad mynta ka don ïa ki liengsuin ba pynïasoh sha ki 9 tylli ki sorbah kynthup ka Kolkata bad Delhi.
Haduh T. 15.5 klur la mang pisa ha ka mang tyngka ban pynjanai ïa ka jingpynïasoh liengsuiñ hapoh ka Jylla, ong u Conrad.
Kat kum ka jingong jong u Myntri Rangbah, ka jingpynjanai ïa ka jingpynïasoh da ka liangsuiñ kan dei kawei na ki kam ba khraw eh ha kaban kyntiew ïa ka ïoh ka kot jong ka Meghalaya.
Haba kylli ha ka por ba ïakren bad ki nongthoh khubor, u Conrad ula ong ba ka Sorkar kam don jingthmu ban jam sha ka kad liengsuiñ ba thymmai.
Ha kajuh ka por, u Myntri Rangbah ula pynbna ka Baljek Airport kan sa treikam noh shen da ki liengsuiñ ba pynïasoh beit beit hapdeng ka Shillong bad Tura. Ka sorkar kan sa tei ruh ïa ki helipad ha Shillong bad Tura ban pynkhlaiñ ïa ka jingpynïasoh na suiñ.
