Tuklar bad ka Assam ba pynthut ia ki kam pynroi ha khappud kyntu u bah Charles ia u CM

Shillong, Lber 23 : U MLA ka Congress na ka Mawhati Constituency uba don ha ka Liang Pyrshah u bah Charles Marngar, u la kyntu ïa u Myntri Rangbah ka Jylla u Conrad K Sangma ba un tuklar halor ka jingkynnoh “lehdonbor” jong ka Sorkar Assam da kaba khang ïa ki kam pynroi kiba la pyntrei ha ki shnong ba don ha khappud da ka jylla Meghalaya.
“Nga kyrpad ïa u Myntri Rangbah ban tuklar ïa kane ka kam bad ban pynsangeh ïa ka jinglehdonbor ka Sorkar Assam na ka bynta ka jinglah pyntrei khlem jingpynthut ïa ki kam pynroi ki ban ai jingmyntoi ïa ki paidbah ba sah ha khappud” ong u Bah Charles Marngar haba wanrah ïa ka jingkylli bynrap ha ka kynta kylli jingkylli hapoh ka ïing Dorbar mynta ka Sngi Palei.
Une u MLA ula kynnoh ba bun ki kam pynroi ba la pyntrei da ka Sorkar Meghalaya ki la shah khang ha ka Sorkar Assam bad ai nuksa ïa saw tylli ki project ba kynthup ïa ka ICDS Building ha Madan Umwang, skul SSA Lower Primary (kaba la shah pynpra), ka skhim JJM ha Jatalong bad ka iingdorbar Shnong ha shnong Umru.
Haba jubab ïa kane, u Myntri Rangbah Conrad K Sangma ula ong ba ka dei ka jingshisha ba katto katne ki project ki la shah pynsangeh hynrei kam dei pat kaba la jia ïa bun tylli ki project.
“Kane ka dei namar kine ki kam ha kane ka thaiñ kaba ngi hap ban pynbeit” ula ong haba pyntip ba ka jingpyntrei pat ïa ki spah tylli ki project ha kiwei ki bynta khappud ki la ïaid shakhmat mynta.
Haba kubur ba ym dei ban pynsangeh ïa kano kano ka kam pynroi, u Conrad ula ong “Kane ka dei ka daw balei ba ngi la ïai bteng ban buddien bad ka Assam haba mih ki jingujor ba shah khang ki kam ba pyntrei. Tang mar syn ïoh jingtip, ki Deputy Commissioner bad ki Ophisar ba dei khmih, mar mar kila ïakren bad ki la pyrshang ban pynbeit ïa kine ki kam kham kloi kat kaba lah”.
Ula bynrap “Ha kine ki khyndiat bnai bad snem, ngi la ïohi ïa shibun ki project, kiba la shah pynsangeh, hynrei ki kam ki la sdang biang”.
U Conrad ula ong ba ki don ki khep ha kaba ki kam pynroi jong ka Sorkar Assam ruh ki la shah khang da ki paidbah kiba dei na Meghalaya.
“Kane ka dei ka daw balei ba ki arngut ki Myntri Rangbah kila ong ba watla ngi lah ban don kano kano ka jingïapher jingmut, ki kam pynroi kim dei ban shah pynsangeh. Namar kata, 99% na kine ki kam kila ïaid beit ïaid ryntih hynrei ki don katto katne ki kam kiba hap ban ïakren” ula bynrap.
U Myntri Rangbah ula kular ban tuklar ïa kum kine ki jingjia bad ong “Nga kyrpad ïa ki dkhot ban phah ïa ki jingtip. Ngi long kiba suk ban ïashem ne iakrem bad ngi angnud shisha ban pynthikna ba kum kine ki jingeh ki dei kiba hap ban pynbeit. Lada don kino kino ki jingeh, ngin tuklar mardor. Ki Dkhot ki lah ban ai da ka jingthoh bad ngin sa ïakren mardor bad ka Sorkar Assam”.