U CEC ula pynïaid ha la ka mon ïa ka rukom treikam ka Commission

Shillong, Nailur 25 : Ka Meghalaya Pradesh Congress Committee (MPCC) ha ka sngi Thohdieng, kala thang ïa ka tyngshop u Chief Election Commissioner (CEC) u Gyanesh Kumar ha ka jaka pynieng kali hajan ka Additional Secretariat, haba kynnoh ba u ïasylla bad ka BJP ban pyniaid ïa ka Election Commission hala ka mon.
Ka MPCC kala pynlong ïa ka jingiaid paidbah ha Shillong bala lamkhmat da u President u Bah Vincent H Pala.Kane ka jingiaid paidbah kala sdang na Congress Bhavan bad pynkut da ka jingthang tyngshop.
U Bah Pala u la ong, “Kumba phi la iohi ha ki kot khubor, u CEC ula pyniaid hala ka mon ïa ka rukom treikam ka Commission.Ha kine ki 10 bnai, 14 tylli ki jingujor la mudui da ki arngut ki Election Commissioner hynrei ula thom ïa ki da ka jingiarap ka BJP”.
Ula ong ba ka Sorkar Pdeng kala pynkylla ïa ka ain ban plie ïa ka lynti ha kaban pyniaid hala ka mon ïa ka kam.”Ka BJP kala pyniaid hala ka mon ïa ka rai jong u paidbah.Ha Haryana, ka Congress kala dei ban jop, ha Maharashtra, ka Congress kala dei ban jop bad ha West Bengal ruh kala don ka jingleh thok kaba khraw, ka jingweng ïa bun bah ki nongthep vote na ka thup” ula ong.
“Ïa ka thup bad ki jingkhein baroh la rai na Delhi da uwei u briew, u CEC bad ka Ophis jong u” ula kynnoh.
Haba dawa iehnohkam bad ban kem, u Bah Pala ula ong “Ngi dawa ba u dei ban hiar shuki bad ieh nohkam mardor. Hadien ka jingiehnohkam jong u, ka dei ban don ka Commission of Inquiry pyrshah ia u. Ngi dawa ba u dei ban shah kem bad dei tang kane kaba ki paidbah kin don ia ka jingshaniah bad ka jingngeit ha ka Riti Synshar bad ka rukom treikam kaba ka Election Commission kala pyniiad mynta la bun snem”.