Nongpoh, Naitung 30: Ki nongïalam ka HYC na Ri Bhoi mynta ka sngi ki la shah khot hajir ha ki Pulit ka Khanapra Police Station, kaba dei halor ka jingleit khynra kot khynra sla kaba dangshen ha kawei ka karkhana u bar jylla ba la tip kum ka Resource Rubber Pvt. Ltd. kaba don ha ka Shnong Mawsmai ha Ri Bhoi.
Kine ki nongïalam ka seng HYC na Ri Bhoi, kiba la shah khot hajir ha ki Pulit, ki kynthup ïa u President u Bah Hercules Suting, u Bah Tony Shylla, General Secretary lem bad u Bah Shan Marweiñ.
Haba leit ban hajir ha katei ka Khanapara Police Station la synran lang ruh da ka jingdonlang ki nongïalam ka HYC na sengkmie ba kynthup ïa u Bah Gee Mawlong, Vice-President ka HYC Sengkmie lem bad ki nongïalam bad ki dkhot ka HYC na Ri Bhoi District.
Haba kren sha ki lad pathai khubor, u Bah Hercules u la ïathuh ba ka daw kaba la shah khot hajir, ka dei tang naba ki leit khynra trading license ïa ka karkhana saiñ jri ha Mawsmai ba la pynïaid da u bar jylla. U la ong ruh ba ma u kum u President bad ar ngut ki la shah khot hajir bad shah pynngat ruh ha ki 6 tylli ki kyndon aiñ hapoh ka Khanapara Police Station.
U la bynrap ruh da kaba ong, ba ma u bad ki dkhot kim sngew eiei satia ïa kane ka jingkhot hajir ki pulit namar ki sngewthuh shai ba kim leh eiei kaba bakla bad laitnoh katei ka jingleit khynra Khaïi Laisen ïa katei ka karkhana saiñ jri ba la pynïaid da u bar jylla khlem da don ki kot ki sla kiba biang.
Shuh shuh, u la pynpaw ruh ba u trai katei ka karkhana um shym la pyni satia ïa ki kot ki sla kiba biang bad na ka liang ka seng ka la dawa na ka KHADC ba ka dei ban leh da kaba tyngeh bad ruh ba kum ka seng kan nym shongkli kti bad kan dang ïaibteng ka jingkhynra ba kum ka seng kam kwah ba ki bar jylla kin shuh wan sengkam sengjam ha kane ka jylla khlem da bud ïa ki kyndon ba la buh da ka sorkar, u la bynrap.
