Kurup ki BSF haduh 19 tylli ki lieng kynda ki nong Bangla ha khappud India Bangladesh

Shillong, Naitung 30: Ki shipai khappud jong ka 193 Bn BSF Meghalaya hadien ba ki la peitngor bha ki la ïoh ban kurup haduh 19 tylli ki lieng jong ki nong Bangladesh kiba la pynïeng ha ka wah Jadukata kaba hajan Ghumaghat ha kaba ki nongkhaïi tuh ki la pyrshang ban jam shapoh u pud u sam ka ri India ban kit ïa ki maw bad u shyiap.
Kane ka jingkloi ban ïoh kurup ki shipai BSF ïa kitei ki lieng ka long kum shibynta ban tehlakam ïa ki kam beaiñ bad ban pynthikna ïa ka jingshong shngaiñ ha ki jaka ba khappud. Kine ki jingkhynra kiba kyrpang ki pyni ïa ka jingangnud ki BSF ban ïakhun pyrshah ïa ki kam beaiñ ha ki jaka ba khappud jong ka ri.
Ka khubor na ki BSF ka ïathuh ba ki runar na ri Bangladesh ki ju pyrshang manla ka por ban rung tuh shapoh u pud u sam ka ri India lyngba ki jaka ba don ki wah khnang ban ïoh tuh da kaba suk ïa ki maw bad u shyiap. Halor kane ki BSF ki la ujor pyrshah ruh bad ki BGB halor kine ki kam beaiñ da ki nong Bangladesh hapoh u pud u sam ka India. Ïa kitei ki lieng ba la kurup la rah noh da ki shipai bad hadien ba la tohkit ki la aiti noh sha ka tnat Custom kaba don ka ophis ha Dangar, East Khasi Hills district.
Ban pynneh ïa ka suk ka saiñ ha shilynter jong u pud u sam ka ri India bad Bangladesh, na ka liang ki shipai ki la pynlong ïa ka commandant-level meeting kaba la long ha ka 29 tarik mynta u bnai, 2024, hapdeng ki BSF bad BGB ban ïakren ïa kiba bun ki kam kiba ïadei bad ka jingïada bad peitngor ha ki khappud hapdeng kine ki ri. Halor kane ki shipai ki la ïathuh ruh ba ka la don ka jingïaid pahara kaba khlem sangeh khamtam ha ki jaka ba khamjur bha ki kam beaiñ.