Nongpoh, Ïaiong 24: Ban lait na kino kino ki jingma ne ki jingmynsaw haba kam na shiliang sha shiliang ka surokbah National Highway-6 ha Ri Bhoi ba hap pdeng ka sor Nongpoh, ka National Highway Authority of India haduh kine ki sngi kam pat lah satia ban pynurlong ïa ka jingdonnkam ki paidbah ban tei noh ïa katei ka Jingkieng ïaid kjat ki paidbah ha katei ka jaka pdeng ka sor Nongpoh.
Kum ban pynkynmaw, ïa kane ka jingkieng ïaid kjat (Foot Over Bridge) la ju ïa kren na ka por sha ka por ba ka NHAI ka hap ban shna kyrpang hapdeng ka sor Nongpoh na ka bynta ban shngaiñ ki paidbah ha kaba kam na shiliang sha shiliang ka surokbah, hynrei kumba long haduh kine ki sngi kane ka jingthrang ki paidbah ban ioh ïa katei ka jingkieng ïaid kjat kam pat urlong satia.
Haba kren halor kane ka jingkieng ïaid kjat, ha ki snem ba la leit noh la ju don ka jingleit jurip bad ka jingïakren naduh ka bor synshar District ka Ri Bhoi, ka Nongpoh Town Committee bad kumjuh ruh ki nongmihkhmat paidbah ka Ri Bhoi bad kumba la pynpaw ha ki snem ba la leit noh la don ruh wat kata ka jingmang tyngka ban shna ïa kane ka Jingkieng ïaid kjat ha kaba haduh kine ki sngi pat ym pat iohi satia ïa kita ki dak ki shin ban shna ïa katei ka Jingkieng ïaid kjat ki paidbah,
Haba kren halor kane ka jingkieng ïaid kjat ha sor Nongpoh, ka la dei shisha kawei na ka jingdonkam ki paidbah ban shngain ha ka leit ka wan na ka bynta ban kam ïa ka surokbah. Kane ka jaka ka dei ruh ka jaka ba tang ki paidbah ki hap ban kam na shiliang sha shiliang ka surokbah National Highway-6, hynrei ka dei ruh ka jaka ba pyndonkam na ka bynta ki khynnah skul ha ba ki leit ki wan sha skul ki hap ban ïaid lyngba kane ka surokbah, hynrei la jin ba la don ka jingkieng ïaid kjat kane kan pynsuk shisha ïa ki paidbah ba kim donkam shuh ban ïaid na ka surokbah bad ki la lah ban ïaid na kane ka jingkieng ïaid kjat ban lait na kino kino ki jingma jingmynsaw ba kane ka surokbah ka dei kawei na ka surok ba ïaid bun bha ki kali paidbah na kylleng ki jylla shatei ka ri Lam Mihngi ka ri India.
Halor kane ka jingbym pat urlong kane ka Jingkieng ïaid kjat ha sor Nongpoh, la ioh ruh ban ïa kren bad u MLA ka Nongpoh, u Bah Mayral Born Syiem, ha kaba kum u Nongmihkhmat paidbah u la pynpaw da kaba ong ha ha ka jinghisha u la ïa kren sha ka NHAI halor kane ka jingthmu ban shna ïa ka Jingkieng ïaid kjat ha sor Nongpoh, hynrei kawei na daw kaba ym pat lah ban leh katkumba la thmu ka dei ka jingbym ioh jaka ha Lad Mawroh.
U la ong ruh kane Jingkieng ïaid kjat ka long kaba donkam haduh katta katta ban shngaiñ ki paidbah ha ka leit ka wan ban jam ïa ka surokbah ha kaba la ïa kren ym tang ha Nongpoh, hynrei kawei ka dei ban don ha Lad Alpha Skul, kawei ha Umling bad kawei ha Patarim ha Umsning.
Shuh shuh, u la bynrap ruh wat la katta ruh kumba la ïa kren ha ki snem ba la leit noh halor kane ka jingdonkam ïa kine ki jingkieng ïaid kjat ki paidbah, kum u MLA un sa dang buddien ban ïa kren sha ka NHAI na kabynta an shim ïa ki lad ki lynti kumno ban pynurlong noh ïa kane ka jingkieng ïaid kjat, namar lada lah ban shna ïa kane ka jingkieng ïaid kjat ka long shisha ka jingshngaiñ ïa ki paidbah bad khamtam ki khynnah skul ba kim donkam shuh ban ïaid na ka suorkbah bad ki lah ban ïaid noh na kane ka jingkieng ha ba jam na shiliang sha shiliang kane ka surokbah, u la bynrap.
