Khlad u heprit 15 snem, mynsaw ki kmie ki kpa bad ka para na ka jingkhyllem u diengbah ha Umling

Nongpoh, Ïaiong 11: Uwei u heprit 15 snem ka rta u la duh noh ïa ka jingim ha shen bad ki kmie kpa ryngkat ka para jong u, ki la mynsaw, kaba dei hadien ka jingkhyllem jong uwei u diengbah ba la ban ha ka jingsah jongki ha Umling.
Kane ka jingjia ka la jia hynnin ka sngi ha ka por 2 baje ei ei, ha kaba la don ka jingbeh ka lyer kaba kham jur bad wei u dieng uba la ïap ula kyllon kynsan ban ban ïa utei u heprit uba la duh ïa kajingim ryngkat ki kmie ki kpa bad ka para jong u kiba la mynsaw jur.
Une u heprit uba la duh noh ïa ka jingim da ka jingkhyllem utei u diengbah la tip kyrteng kum u Banijied Hasdah uba dang pule Class-X ha St. Francis School, Umling bad ki kmie ki kpa jong u pat la tip kyteng kum u Nicholas Hasdah bad ka Moni Kisku.
Halor kane ka jingjia, na ka liang ki bor shnong bad ki Pulit ka Ri Bhoi tang mar ïa ioh jingtip ki la hiar mardor ban ïarap ïa ki, hynrei utei u heprit u la duh noh ïa ka jingim na ka daw ka jingshah ban ha utei u dieng bah bad katba ki kmie ki kpa jong u ki la shu mynsaw ban rah noh sha Civil Hospital ban ioh ïa ka jingsumar.
La ïathuh ruh ba ïa ka met jong une u heprit ruh la rah sha Civil Hospital Nongpoh ba la pyndep noh ïa ka postmortem mynta ka sngi, ha kaba kiba haing ki la rah noh ïa u sha la shnong sha Assam ban tep don burom noh ïa u.
Kumba la paw, na kane ka jingkyllon une u diengbah ba ban ïa katei ka ïing, katei ka ïing ka la jot bad pra hi phum bad ka daw kaba la kyllon utei u diengbah ka dei namar ba u dei u dieng uba la ïap bad na ka jingpyud na ka trai jong u diengbah u la kyllon noh hadien ka jingwan ka lyer kaba kham jur, ong ka tyllong khubor.