Ki Rangbah Shnong ki Myntri bad Sordar kim lah ban ïashim bynta bad ka sain pyrthei : KHADC

0

Shillong, Iaiong 11 : Ka Khasi Hills Autonomous District Council (KHADC) ha ka jingpynbna ba pynmih ha ka 4 tarik Iaiong, kala khang ïa ki Rangbah Shnong, ki Myntri bad ki Sordar Shnong ban ïadon bynta ha ki kam saiñ pyrthei bad don bynta ruh bad ki seng saiñ pyrthei.
Kat kum kane ka jingpynbna ba la soi da u Secretary ka EC, la pyntip ba ka Executive Committee kaba shong jingïalang ha ka 15 tarik Lber kala rai ba “Ki Rangbah Shnong, Myntri Shnong bad Sordar Shnong, Matabor, kim dei ban ïadon bynta bad kino kino ki seng saiñ pyrthei lane ki kynhun kiba ïadonbynta ha ka kam saiñ pyrthei lane ïarap ha kano kano ka bynta bad ki kam saiñ hima sima”.
“Baroh ki Khlieh Nongsynshar kata ki Rangbah Shnong, Myntri Shnong, Sordar Shnong, Matabor, ki dei ban ïoh ïa ki Sanad na ki Khlieh Nongsynshar jong ki Hima kat kum ki Aiñ, ki Rule jong ki Hima/Elaka. Kano kano kaba long pyrshah ïa kane yn ñiew beaiñ bad shim ruh kan ym treikam shuh” kala bynrap.
Ka KHADC kala pynbna ba kino kino ki Nongmihkhmat ha ka jaka jong ki Dorbar Shnong shuwa ba kin ai ïa ki “Residential Certificate” sha ki Nongshongshnong, ki dei ban da pynthikna shuwa ïa ka jinglong jingman jong kine ki Nongshongshnong kat kum ka Aiñ, Rules jong ka Hima/Elaka.
Nalor kane, ka KHADC kala bthah “Ki Rangbah Shnong, Myntri Shnong, Sordar Shnong, Matabor ki dei ban ai Residential Certificate sha ki paid Khasi kat kum ka Khasi Hills Autonomous District (Khasi Lineage) Act, 1997 bad ki Rule jong ka. Nalor kata, ym dei ban ai ïa kano kano ka Residential Certificate ïa kiba kylla ïa ka Kur/Jait lane ba shim ïa ka Kur/Jait jong kiwei khlem da ïaid kat kum ka kyndon 3 bad kyndon 12 jong ka Aiñ bala kdew haneng”.

Leave A Reply

Your email address will not be published.