Shillong, Iaiong 11 : Ka seng Hynniewtrep National Liberation Council (HNLC) kala sei mynta da ki kyndon ban bteng ïa ka jingkren ïasuk bad ka Sorkar ba kynthup ïa ka kam ba ïadei bad ka Instrument of Accession (IOA) bad ka Annexed Agreement (AA).
U Nongmihkhmat ka HNLC bad President ka Hynniewtrep National Youth Front (HNYF) Bah Sadon K Blah haba pyntip ïa kane mynta ka sngi Ba-ar, ula ong “Ngim lah ban ong ba ka jingïakren kan dei kaba khlem ka jingbuh kyndon namar ki don ki kyndon kiba ngi la buh hakhmat sorkar”.
“Ki jingkren hi kim lah ban long 100% ba khlem kyndon namar lada dei kaba khlem jingbuh kyndon, ngim donkam shuh ban ïakren. Ki don ki mat kum ki kam synshar khaddar bad kiwei kiwei ki kam kiba ïadei bad ki nongrim jong ka HNLC kiba la don mynta la 35-37 snem ba hap ban ïakren” ula bynrap.
U Bah Sadon ula ong ruh ba ka kam ba ïadei bad ka Instrument of Accession (IOA) bad ka Annexed Agreement (AA) ruh ka dei shibynta jong ka jingïakren.
Haba pyntip ba ka jingïakren ba kongsan kam pat sdang satia, u Bah Sadon ula ong “Ka jingïakren kyllum para ma ngi (unofficial) ka dang ïaid shaid shaid hynrei ka jingïakren ba kongsan (official) halor ki mat kam pat sdang satia. Kine ki kam kiba ngi dang ïapyrshang ban pynbeit mynta ban lah pynïaid noh shakhmat ïa ka jingïakren ba kongsan bad kyrpang”.
Une u Nongmihkhmat ka HNLC ula pynpaw ba um lah satia ban batai lut ïa kiei ki mat ïakren jong ka HNLC namar ïa kane un sa wanrah hadien ba la sdang ka jingïakren kaba kongsan bad ka Sorkar.
Haba kylli, u bah Sadon ula banjur ba ka jingmap noh (amnesty) ïa ki kam pyntriem kiba rim, ka dei kaba donkam khnang ban lah pynïaid shakhmat ïa ka jingkren ïasuk.
“…Kino kino ki kam pyntriem ba ïadei bad kane ka kynhun kiengatiar la ki dei ha India ne kiwei kiwei ki bynta jong ka Pyrthei bad ha ka thaiñ Shatei Lam Mihngi ruh, la donkam ban weng noh ia ki jingpynngat kyndon namar kane ka dei kaba kongsan bha ban mab noh” ula ong haba pyntip ba ki arliang mamla kim pat ïakren satia halor kane ka jingmab noh ha kano kano ka kyrdan bad shisien ba la sdang ka jingïakren ba shisha “Ngin sa ïakren ïa kine ki kam bymman namar ka jingmab noh ka dei kaba kongsan”.
Haba pynpaw ruh ba kam don satia kino kino ki diengpynkiang ha ka lynti jong ka jingkren ïasuk, une u Nongmihkhmat ka HNLC ula ong ba ka Sorkar India bad ka Sorkar Jylla kila kut jingmut ban sdang noh kham kloi kat kaba lah ïa ka jingkren ïasuk.
“Ka Sorkar kala dep ai ïa ka lynti ïaid ba shngainñ ïa ki Nongïalam ka seng HNLC ki ban ïadon bynta ha ka jingkren ïasuk” ula pyntip.
Halor kawei pat ka jingkylli, u Bah Sadon ula ong “U Nongïalam barim ka HNLC (L) Cheristerfield Thangkhiew um shym la don bynta satia ha ka jingkren ïasuk ha kato ka por bad kaba ar ba um dei ruh uba wan pyndemwait, hynrei u dei uba shongthait na ka HNLC bad kam shonghok ïa u ban kam ïa ka song jingïarap naba u khlem wan pyndem wait ha ka por ba ïaid ka jingkren ïasuk”.
Ula ong ba ka seng HNLC kam pat ïakren satia ïa ka kam ba ïadei bad ka song jingïarap.
Ha kawei ka liang, u bah Sadon ula ong ba ka jingïakren ïasuk kam dei ka kam kaba lah ban shu shim rai kyrkieh.
“Ka jingïakhun jong ka HNLC ka la don mynta la jan 40 snem bad ban shu shim rai kyrkieh ka lah ban lam sha kano kano ka jingjia ka bym sngewtynnad” ula ong haba kyntait ban kynthoh ïa ka jingkhlaiñ bor jong ka HNLC kumba long mynta.
