Khlem shah ktah kti u Pastor bad Tymmen Basan ha ki Bajrang Dal la ïalam ïa ki sha PS : Dy CM

Shillong, Iaiong 11 : U Symbud Myntri Rangbah ka Jylla Bah Prestone Tynsong, mynta ka sngi Ba-ar ula kyntu ïa ki paid nongshong shnong ka Jylla ban nym pynsaphriang ïa ka video ba shah bat ki Nongïalam Niam na Meghalaya ha ki dkhot ka Bajrang Dal ha Patna, Bihar bad ba aiti sha ki Pulit namar kim shym la shah ktah kti kumba la kynnoh hynrei ka la jia tang ka jingïa pyni nia ba jur.
U Symbud Myntri Rangbah ula kyntu ïa ki paidbah ba kin ym pynsaphriang ïa ki jingtip ka bym dei, kaba lah ban wanrah ïa ka jingkynad sngew pher jaidbynriew hapoh ka Jylla.
Haba pynshai ïa kaei kaba jia, u Bah Prestone ula ong ba ka don tang ka jingïapynphai ktien markylliang bad ki Nongïalam Niam kim shym la shah ktah kti satia.
Haba pynsngew ïa ka jingsngewkhia ba ka jingpynsaphriang ïa ka khubor thok ka lah ban lam sha ka jingïakynad sngew pher jaidbynriew ha Jylla, ula kyntu ïa ki paidbah ban kiar na ka jingpynsaphriang ïa ka video ha ki social media.
U Bah Prestone ula kular ba ka Sorkar kala shimkhia ïa kane ka kam bad kala shim ruh ïa ka sienjam ba dei ban shim.
U pyntip ba u Chief Secretary ka Jylla bad ki Heh Pulit kila dep ïakren bad ki Ophisar jong ka Bihar bad la kyrpad ruh ban ai ka jingpahara ïa ki arngut ki Nongïalam Niam. U Bah Prestone ula pynthikna ba kane ka dei ka dei kaba la dep ïapynbeit hapdeng ki arliang mamla.
Kine ki arngut ki Nongïalam Niam la khmih lynti ba kin wan poi mynta ka miet ha Guwahati hadien ba ki la mih noh na Patna mar syn jia kane ka jingjia.
U Superintendent of Police ka East Khasi Hills Bah S Nongtnger, ula pyntip ba u Director General of Police (DGP) ka Jylla bad ki Pulit ka East Khasi Hills ki la phone hi dalade sha u Superintendent of Police ka Patna bad Superintendent of Police (Sity) East Patna halor ka jingïoh jingtip ïa kane ka khubor ba saphriang ha ki social media ba shah shoh ki arngut ki Nongialam Niam na Shillong ha Bihar.
Kat kum ka jingong jong u, la ïoh khubor ba ha ka por 1:30 baje mynta ka nohphai sngi, ka khubor hamsaia ka la saphriang ba ka don ka jingpynkylla niam ha kawei ka ïing ha Patna ha kaba ki briew ki la leit ban khynra kaba lam sha ka jingïania bad ktah kti ïa ki briew ba don hapoh ka ïing.
U ong ba ki Pulit ka Alamganj Police Station kila wan poi ha kane ka jaka bad ki la synran noh ïa kine ki arngut ki Nongïalam Niam ba khlem don jingmynsaw eiei ruh em sha Thanad ban ai jingïada.
U pyntip ba la dep ïakren ruh bad ki Pulit ka Bihar ba kin ai ka jingpahara bad jingïada ïa kine ki arngut ba kin wan phai sha Shillong. U ong ba ki Pulit ka Bihar kila synran ïa kine ki arngut haduh kad liengsuiñ bad ka jingtohkit mynta kala ïaid shakhmat pyrshah ïa kine ki nongleit pynkulmar.