Kerkut ki Bajrang Dal ïa u Pastor bad T.Bn ka Laitumkhrah ha Bihar ba kynnoh pynkylla niam

Leit pyllait ki Pulit bad synran ban wan phai noh sha ïing

0

Shillong, Ïaïong 11: Arngut ki nongïalam jong ka Balang Presbyterian Laitumkhrah, u Pastor Rueben G. Laloo bad u T.Bn (Dr) T. Nongkhlaw ki la shah bat ha ki riew runar mynta ka sngi ha Bihar bad ki la shah rah sha thanad Pulit. Hynrei na ka liang ki Pulit hadien ba ki la tohkit ïa ki, kim shym la lap eiei bad ki la pyllait noh ha ka por janmiet bad mynta kine ki arngut ki la wanphai noh ha nongbah Kolkata. Lashai kin wan phai noh sha ïing.
Haba ïakren bad u Pastor EL Kharmawphlang, Pastor Incharge ka Balang Laitumkhrah, u la ïathuh ba kine ki arngut ki la leit sha Bihar namar u don uwei u paralok Pastor ba trei shathie. Hynrei ha ka por ba ki dang pynlong jingduwai, shi kynhun ki briew ki bym lah ban ithuh ki la wan rung jubor ha ïing. Hynrei hadien la wan poi noh ki Pulit kiba la ïalam noh ïa u Pastor bad Tymmen Basan sha thanad ban ai ai jingïada ïa ki.
Hynrei hadien ka jingtohkit ha thanad, la shem ba kam don ei ei kaba kum kata bad na ka liang ki Pulit ruh ki la pyllait noh ïa ki khlem da rejistar case ei ei. Hynrei kane ka khubor ba shah bat kine ki nongïalam Balang sha Bihar ka la pur sted ha ki Social Media hangne ha jylla bad bun ki briew ki la wad jingtip halor kane ka jingshah bat jong ki.
Ha ka por 4:10 baje janmiet, u Myntri Rangbah ka jylla, u Conrad Sangma, u la thoh ha ka twitter jong u ban pynrem jur ïa ka jingleh ki riew runar ha Bihar pyrshah ïa kine ki nongïalam ka Balang Presbyterian Laitumkhrah. Na ka liang jong u, ula ong ba u la bthah ïa ki Pulit ka jylla ban ïakynduh kyrpang ïa kine ki nongïalam niam ban wad jingtip khambha khnang ban ïoh ban ujor da ka ejahar sha ki Pulit Bihar pyrshah ïa kine ki riew runar ba la pyndik ïa u Pastor Laloo bad T.Bn Nongkhlaw.
Na ka liang u SP ka East Khasi Hills, u Bah Sylvester Nongtnger, u la ïathuh ba ha ka por 1:30 mynsngi, ki khubor ki la saphriang ba ka la don ka jingpynkylla niam jubor ha ka ïing ba don u Pastor bad u Tymmen Basan. Na ka liang u SP East Khasi bad u DGP ki la ïakren kyrkieh bad u SP ka Patna bad u SP (City) East Patna halor kane ka jingjia. Na ka liang ki Pulit ki la poi ha katei jaka, ha kaba ki la lap ba shi kynhun ki briew ki la don ha katei ka ïing bad ki la don ka jingïapyni nia bad ka jingktah kti. Na ka liang ki Pulit ka Bihar ki la ïalam noh ïakine ki arngut sha Thanad ha ka por janmiet la pyllait noh ïa ki bad la leit synran shaduh kad Liengsuiñ ba kin leit phai noh lyngba ka nongbah Kolkata. U SP ka East Khasi Hills u la ïathuh ruh ba na ka liang ki Pulit ka Bihar kin sa shim jingpynshitom katkum ka aiñ ïa kine ki riew runar.
Na ka liang u Symbud Myntri Rangbah, u Bah Prestone Tynsong, u la ïathuh ba mar ïa ïoh jingtip ïa kane ka jingjia, ka sorkar ka la bthah ïa ki Pulit ka jylla ban ïakren wut wut bad ki Pulit ka Bihar ban ai jingïada ïa kine ki arngut ki nongïalam Balang. U la ong ba lyngba kane ka jingtreikam kaba sted kine arngut ki la lait na ka jingma jingmynsaw.
Ka Khasi Jaiñtia Church Leaders Forum ruh ka pynpaw ka jingsngewkhia halor kane ka jingjia ha Bihar. Hynrei ka kyntu ba long jai jai bad nym ngeit kulmar ruh ïa kaei kaba mih ha ki Social Media. Haba pynrem jur ïa ki kam thombor pyrshah ïa ki nongtrei mishonm, ka Forum ka kyntu ruh ïa kito kiba trei ha ki kam mishon ba kin da peit bha katkum ka jinglong ka jaka.
Na ka liang u MLA ba rim ka Mawlai u bah P. T Sawkmie u la pynrem jur halor kane ka jingjia kaba la jia ïa I Pastor R.G Laloo bad Tymmen Basan T.Nongkhlaw ha Patna, Bihar ha ki briew ki bym lah ban ithuh kiba la pynthut ka ka jingleit jngoh jongki ïa ka lyngkha trei jongki ha katei ka jaka.
Na ka liang jongu u kyrpad ïa u Myntri Rangbah u Conrad K Sangma ba u dei ban thoh da ka shithi sha u Myntri Rangbah ka Bihar ba dei ban kem bad pynshitom ïa kitei ki briew ba donkti namar kine ym tang ba ki pynthut tang ïa ka shongsuk shongsaiñ hynrei ki thombor ïa ki paid Khristan ha katei ka jaka.

Leave A Reply

Your email address will not be published.