Khlad ki 3 ngut ki heprit ha ka shnong Khliehumtrew na jingkem ding u skum kba ba ïalehkai para khynnah

0

Nongpoh, Kyllalyngkot 12: Tang na ka daw ka jingïalehkai para khynnah bad ha ka por bym poi pyrkhat ki lai ngut ki heprit ki la duh ei noh ïa la ka jingim khlem da poi pyrkhat, kaba dei hadien ba u skum kba u ba ki ïalehkai para khynnah ula kem ding kynsan haduh ba ki la duh syndon ïa la ka jingim ba kordor na ka jingpluh jong u skum kba.
Kane ka jingjia ba sngewsih ka la jia ha hynnin ka janmiet Sngi Balang ha ka por 2 baje ei ei janmiet ha ka Shnong Khlieh Umtrew ha Ri-Bhoi District.
Kumba la ioh lum jingtip, ha kane ka jingjia, ki 3 ngut ki heprit ki la duh noh ïa la ka jingim bad uwei u heprit u la lait im hadien ba la ioh ban mih noh na u skum kba uba ki ïalehkai para khynnah.
Ki ar ngut kiba la duh ïa ka jingim ki kynthup ruh ïa ki khun synrap kiba la don 3 snem tam bad uwei pat uba 2 snem tam bad utei u heprit ba la lait im pat ula don 4 snem tam.
La ïathuh ruh ba kitei ki khynnah ki ïalehkai para khynnah hapoh jong utei u skum kba bad uwei na u khynnah uba la duh noh ïa ka jingim u la wiang ding ïa u skum kba da u dieng kyndok jingpruid bad dei namar ba ki don shapoh jong u skum kba ba kim shem la lah ban mih noh shabar ba ka ding kaba klang na u skum kba ka la ioh ban bamduh ïa ka jingim ba kordor jong kitei ki 3 ngut ki heprit.
Halor kane ka jingjia, la ïoh jingtip ruh ba ki bor Pulit na Ri-Bhoi ki la hiar mardor sha katei ka jaka ban pynlong ïa ka jingtohkit halor ka jingduh noh kitei ki heprit ïa ka jingim ba kordor kaba dei na ka daw ka jingkem ding jong u skum kba bad ïa kine ki heprit la pynlait noh na ka Postmortem Examination kaba dei hadien ba kiba haïing ki la pan bor na ka bor synshar District ban pynlait. Kane ka jingjia ka la pynsngewsih kthang ym tang ïa ki kmie ki kpa kiba la duh noh ïa la ki khun baïeid ba thoiñ bad ka la long ruh ka jingsngewsih kthang ïa ki paidbah nongshong shnong ka Khliehumtrew hi baroh kawei. Na ka liang ka bor shnong bad kiba haïing hadien ba la pyndep ïa ka jingtohkit na ki bor pulit mynta ka sngi ki la tep don burom noh ïa kitei ki l3 ngut ki heprit hadpeng ki ummat sngewsih kthang ban duh noh ïa kitei ki heprit khlem pat da dei por.

Leave A Reply

Your email address will not be published.