Wat ong ba nga dei u nongïalam ka jaidbynriew lymda phi pynjop ïa ki kyrtong ba ngi pynïakhun: Ardent

Shillong, K’lyngkot 12: U President ka Voice of The People Party (VPP) u Bah Ardent M Basaïawmoit haba kren ha ka jingpynshai paidbah ïa ki nongrim jong ka party bad ka thong ba ka don na bynta ka jylla ha ka sngi Palei ha Motphran, u la ong ba ka jingdon kiba khot ïa u kum u nongïalam ka jaidbynriew ha u hi um pat pdiang satia ïa mynta dei tad ynda ki paidbah ki pynjop ïa ki kyrtong kiba ka party kan pynïakhun.
U Bah Ardent u la ong ba ka kumba long mynta um pat smgwdei ba un shah khot u nongïalam ka jaidbynriew namar um pat ïoh ka jingpynkupbor ban shim ïa kane ka jingkit khlieh hynrei kaei kaba u dang ïoh ka jingpynkupbor kum u nongïalam ka dei tang kum u nongïalam ka VPP.
“Nga kwah ban kren da kaba shai hangne ba ngam pat dei uta u nongïalam ka jaidbynriew hynrei tang kum u nongïalam ka VPP namar ïa nga la pynkup bor ban shim ïa kane ka bynta bad wat ong ba nga dei u nongïalam ka jaidbynriew lymda phin pynjop ïa ki kyrtong kiba ngi pynïakhun na ki constituency jong phi namar ngam don hok hi ban shah khot kumta ruh,” u la ong.
Shuh shuh u la ong ba kum ka party hi ka la dep ban jied ïa ki kyrtong kiba biang bad kiba kynsai ban aireng ïa ka elekshon namarkata ki paidbah kim dei shuh ban dang artatien ha ka party bad ki kyrtong kiba ka VPP ka pynïakhun.
“Lada phi peit ïa ngi kum ki nongïalam wat kylli shuh uei u kyrtong uba ngin pynïakhun bad wat ai daw ba phim ibang ïa uta u kyrtong hynrei pynjop beit ïa ka VPP bad ngi kular ba phin ym babe lada phi pynjop ïa ngi,” u la bynrap.
U Bah Ardent u la ong ruh ba ki nongshong shnong ka jylla ki la shah pynbiej ha ki nongsaiñ pyrthei ha kine ki sanphew snem kiba la leit bad mynta ki paidbah kin ai jingsneng kylla ïa ki.
“Ki paidbah ki la shah thok ha kine ki 50 snem bad ha kane ka kynti kaba mynta ki paidbah kin thok kylla ïa kine ki riewthok kiba la pynbiej ïa kine ki paidbah ba luilui ha kane ka elekshon kaba mynta kin shah shukor kylla ha u paidbah,” u la ong.
Haba kren halor ka jingshong shngaiñ ka jaidbynriew u Bah Ardent u la ong ba ka long ka man ka jaidbynriew hi ka long kaba i shong syier bha amar ka jingtlot jong ngi kum ka jaidbynriew haduh ba ki nud ban leh donbor ha ka ri bad ka muluk jong ngi.
“Kum ka jaidbynriew ngam ong ba ngi don ha tmir ka riat hynrei ngan ong ba lada ngim kylla ha kane ka elekshon 2023 ka por ba ngin hap ring mynsiem bad lyer bad um kam jngai shuh,” la ong u Bah Ardent.
Shuh shuh u la bynrap ruh, “Wat sngew kop ba ngi dang long trai ha ka ri lajong namar ka jinglong trai jong ngi ka la nang syntuid bad kynmaw ruh ba lada don u khyllah jait ba bakla ha Khyndailad, Polo mano na ngi ki khla ka wait kiba nud ban pynneh?” u la buh jingkylli.
Haba kren halor ka bamsap bampong ha ka jylla, u Bah Ardent u la ong ba ha ka jingshisha kane ka sorkar kam dei shuh ka sorkar kaba bamsap hynrei kaba bamduh syndon katba don na bynta ka jingmyntoi ki katto katne.
“Lada phi peit ïa ka jingpynlut pisa ka jingpynlut ka long kaba shyrkhei haduh katta katta, la pynsyrwa ïa ka pisa ban pynsngewbha thung Chairman ha ki tnat sorkar kiba bun kaba ka jinglut ïa uwei u chairman ka poi da ki lak ki lak, nalor nangta ruh, mynta lei ka sorkar ka wanrah sa kita ki consultancy kiba na shabar jylla ha ka jinglut kaba jur bha,” u la ong.
Ha kane ka sngi kaba ka party ka pynshai ïa ki nongrim jong ka la ïoh ruh ka jingkren na u Samla Avner Pariat uban ïakhun na East Shillong, u Bah Danny Langstieh u kyrtong na South Shillong ha ka jingïadon lang ki nongïalam bad ki kyrtong ka VPP ba kynthup ïa u Bah Brighterwell Marbaniang na Mawlai, Dr Ricky Synkon na Umsning bad kiwei kiwei de ki kyrtong.