Shillong, K’lyngkot, 12: Ka kynhun jong ki ophisar rangbah ka Election Commission of India (ECI) ha ka sngi Palei ki la wan iuhkjat ha nongbah Shillong na ka bynta ban ïathir ïatai ha kaba ïadei bad ka jingpynkhreh jong ka Jylla Meghalaya ïa ka Elekshon sha ka Iingdorbar Thawaiñ ka jylla ka ban sa long mynta u snem.
Kane ka kynhun jong ka Election Commission tang shu iuhkjat ha nongbah Shillong ka la pynlong ïa ka jingïakynduh lang bad ki nongïalam jong ki seng saiñpyrthei ban ïathir ïatai kumno ban pynkhreh bad ban pynïaid beit ïaid ryntih ïa ka elekshon ban jied ïa ki nongmihkhmat ba thymmai ha kane ka jylla.
Kum ka jingpynsngewthuh sha ki paidbah nongthep vote, ki heh ka ECI ki la kaweh lama ïa ki ‘Super 6” lane ki hynriew tylli ki thong ban pyntreikam kiba kynthup ïa ka jingpynsuk ïa ki nongthep vote ba la tymmen ka rta, ban pynsuk ïa ka leit ka wan jong ki briew kiba duna dkhotmet, ban pynshlur ïa ki kynthei ban ïashim bynta ha ka elekshon, ka jingkhuid jingsuba ha kaba pyntreikam ïa ki EVM-VVPAT bad ka jingïashim bynta laitluid jong ki samla.
Ka Commission la pyllait paidbah ruh ïa ka KAP Baseline Report jong ka jylla, ka kot lyngkdop ba la thoh bniah halor ka Super 6 SVEEP bad ka SVEEP Music Video kaba la ai kyrteng “Vote for Sure.”
