U Bah Gavin dei u thlong nar bym pait bad kum u thring shisien puh kiew ka roi ka par ha Sohra

Shillong, Kyllalyngkot 12 : Ki nongkyrshan bad nongïalam ka People’s Democratic Front (PDF), kiba la sat sia ïa ki jingshah kynnoh u MLA jong ki u Bah Gavin M Mylliem ba u dei u thlong ha Assembly bad u thring ha Constituency ha ki nongïalam ka United Democratic Party (UDP), ha ka 12 tarik u Kyllalyngkot, 2023, ki la ïoh ka kabu ban pynphai nia ïa kitei ki jingshah kynnoh lyngba ka jingïalang ïakynduh ki nongkyrshan ka Party ha madan ïalehkai phutbol ka shnong Mawkdok.
Ha kane ka sngi, ki nongïalam ka United Democratic Party (UDP) na kylleng ki dong ki shnong ka Sohra Constituency kiba la wan ai jingkyrshan ïa ka PDF da ka jingthmu ban pynjop biang ia u Bah Gavin na ka bynta ka elekshon nongthawaiñ sha ka Ïing Dorbar ka Jylla mynta u snem ki la ong ba ka nongrim wan ai jingkyrshan jong ki ka long halor ki kam kiba khraw kiba u MLA u la leh ha kine ki san snem ba la dep na ka bynta ki paidbah bad ki kwah ïa u ban bteng biang ïa ka kam kum u nongmihkhmat ka Sohra.
Na ka liang ki nongïalam bad ki nongkitkam ka PDF Zonal Committee Sohra Constituency ki la kynther tyngeh ïa ki nongïalam ka UDP da kaba ong ba ki jingkynnoh khamtam ba u MLA ki u dei u Director ka phlim Pynngop ka lah ban dei ka jingshisha ha kaba baroh mynta na kiwei pat ki party kum u Bah Donevan Kharwanlang, MDC barim ka Congress na Sohra ruh ki wan ai jingkyrshan lang bad ki ngop namar ki ïohi ia ki kam u Bah Gavin.
Ki nongïalam ki la ong ba u Bah Gavin ha ki san snem ka jinglong MLA u la wanrah ïa ka roi ka par kaba la palat liam na kiwei ki MLA kiba la mih khmat ïa ka Sohra bad khamtam u don ïa ka jinglong sngewrit, ka mynsiem kaba ïaishah bad khang ïa ki nongkyrshan jong u ban kynthoh kylla ïa ki jingshah kynnoh ba lai phew jait.
U Bah Gavin M Mylliem haba kren ha ka jingïalang u la kyntu ïa ki nongkyrshan bad ki nongïalam ban long kiba jai jai ha ka lynti ïaid sha ka elekshon ka ban sa long ha ki khyndiat taïew ban wan. Halor ka jingshah kynnoh ba u dei u Director ka phlim Pynngop, u la ong, “Tang kawei ka phlim ruh ngam pat shna nga la ïoh ia ka kyrdan Director hynrei ngam sngew eiei ïa ki jingkynnoh kumba nga ju kren bad nalade hi ngam ju kynthoh”.
Da kaba pynkynmaw ba u MLA barim, Bah Titos W Chyne uba dei ruh u MDC ba mynta ka Sohra ha ka por ba u la shah rem ha ka elekshon MLA 2018 u la ong ba ka daw ka jingshah rem jong u ka dei na ka daw ka bor pisa, u Bah Gavin u la ong ba kaba nyngkong ka shong ha ka mon jong u Blei bad ka jingïatreilang hapdeng ki nongkyrshan bad ki paidbah ban jop ïa ka elekshon.
“Haba nga ïaleh ïa ka elekshon MLA ban shakri ïa ki paidbah ngam kwah ban jop tang shi sien bad ban pynurlong ïa ka jingangnud ban nang ïai jop ban ai ka jingshakri ka dei lyngba ka jingïatreilang bad phi paidbah”, u la ong bad bynrap ba donkam ban jop da ka jingieid ïa u paidbah bad da ka jingtrei bha.
U MLA ha kane ka sngi u la pyntip ruh lyngba ki jingthoh ha ki flex kiba la wah ha katei ka madan ïa ki kam kiba u la leh na ka bynta ka Constituency ha kaba na ka bynta ka kam ba ïa dei bad ka jingshna surok u la wanrah haduh T. 190,47,41,170 na ka bynta 117 KM, ki jingtei kiba kot sha ka T.8,29,60,200 na ka bynta 58 tylli kiba kynthup ïa ka Sohra Market Complex.
Nangta ki kam ban kyntiew ïa ka imlang sahlang kum ki ïing dorbar shnong, ki lynti ïaid kjat, ki jaka leit bar, ki jingïarap sha ki Dorbar Shnong, ki Village Organisation kiba la kot sha ka T. 4,26, 14,190 na ka bynta 281 tylli kum kitei jait jingtreikam, ki kam ban kyntiew ïa ki kam ïalehkai ba la kot sha ka T. 2,40,68,300 kum ka jingshna ïa ki madan ïalehkai, ki jaka peitkai bad ki jingïarap ïa ki synjuk ïalehkai na ka bynta 28 tylli kum kitei ki jingkam.
Ka Sohra Constituency ka la ïoh ruh ïa ki skhim sam um bapher kiba da kheiñ kyllum ka la poi sha ka T. 64, 19,47,161 na ka bynta 69 tylli ki projek, ka tnad pule puthi ha ka ban ïarap ïa ki skul u MLA u la pynïoh T. 17,72,90,320 kiba don 110 tylli ki jingtreikam. Ha kaba ïa dei bad ka koit ka khiah u la wanrah 33 tylli ki projek kiba la kot sha ka T.14,99,34,469 bad haba kheiñ kyllum baroh u MLA u la wanrah ka mang tyngka kaba la poi sha ka T.2,21,35,26,350 naduh u snem 2018 haduh u 2023.
U Bah Donevan Kharwanlang, MDC barim ka Sohra bad uba la ïakhun pyrshah ha ka elekshon MLA 2018 haba pynpaw ïa ki nongrim jingwan kyrshan lang jong u ïa u Bah Gavin da kaba iehnoh ïa ka Congress, haba kren ha katei ka jingïalang u la ong ba ka jingïakren ka long ban pynjop ïa u Bah Gavin ban pynjop biang ïa u ha ka elekshon MLA 2023.
“Nga la ïohi ba u MLA u la leh bun ki kam bad trei shitom bad khamtam ka jingïoh ïa ka ïew Sohra”, la ong u Bah Donevan. Kiwei kiba la ai jingkren ki kynthup ïa u Bah Auspicious Lyngdoh, General Secretary ka PDF, u Bah Iohbor Riwan, Secretary ka PDF Sohra, u Bah Justin Shabong, u Bah Blooming Lyngdoh, nongkyrshan barim u Bah Titos, ki nongïalam na ka UDP na ki shnong bapher bapher lem kiwei pat.