Shillong, K’Lyngkot 12: U national vice president ka National People’s Party (NPP) bah Prestone Tynsong u ba dei ruh Symbud Myntri Rangbah ka jylla ula kyntu ïaki paidbah ka Meghalaya ba kim dei ban bieij ne ngop ha ka jingpynbieij ka All India Trinamool Congress (AITC) da ka song pisa ba T.1000 shibnai namar kane ka party kan ym poi hi sha ka thong ban ïoh thaw sorkar.
Haba kren ha ka jingïalang jong ka NPP kaba la long ha madan Polo mynta ka sngi, u bah Prestone ula ong ba kane ka jingthong ka AITC daka song pisa ba T.1000 ïaki longkmie bad ïaki samla lyngba ka WE Card skhim kadei tang ka buit ilekshon bad la thikna ba kane ka party kan nym lah da lei lei ruh ban thaw sorkar ha Meghalaya.
U la ong “Kum u kpa jong ka ïing ngan ym shah ïa ka kurim ban shim ïa ka sonng pisa ba tang 1000 tyngka. Kumta kum ki longkpa, ki long kmie ki samla wat ngop ha kane ka jingkular kaba long tang ha suiñ” ong u bah Tynsong.
U bah Prestone ula ong ba lada kane ka Party AITC ka sngewkhia shisha ïaki longïing baduk hapoh Meghalaya kam dei ban ap haduh da kut ilekshon hynrei kadei ban pyllait noh mar dor ïa kane ka song pisa sha kito kiba la pynrung kyrteng.
U la ong ba ka khliehduh ka AITC ka Mamata Banerjee kaba dei ruh ka myntri rangbah jylla West Bengal kala synshar ïa kane ka jylla da ki phew snem bad lada ka sngewkhia shisha ïaki paidbah Meghalaya kadei ban kit lut ïaka pisa ba ka don ban sam sha ki paidbah mynta hi, ymdei ban ap tang ïaka por ilekshon.
“Nga kyntu ïaki paidbah ba kim dei ban bieij hynrei ki dei ban long kiba stad ban kyntait mardor ïa kane ka song pisa ba tang T.1000 ba thong daka AITC” la bynrap u bah Prestone.
