Resaiñ u Bah Adelbert Nongrum kum u MLA

0

Shillong, K’lyngkot, 12: U MLA ba marwei jong ka Khun Hynñiewtrep National Awakening Movement (KHNAM) u Bah Adelbert Nongrum ha ka sngi Palei u la iehnoh ïa ka jinglong MLA jong ka North Shillong Constituency da kaba aiti ïa ka shithi resaiñ ha u Lamphang jong ka Iingdorbar Thawaiñ ka Jylla u Bah Metbah Lyngdoh.
Ha ka jingïakren bad ki lad pathai khubor, u Bah Adelbert Nongrum ula ïathuh ba un sa pynïasoh bad ka Voice of the People Party (VPP) ha ka taiew ban sa wan.
“Hadien ba nga la jop ha ka elekshon ha u snem 2018 nga la pyrshang katba don ka la buit ka bor ban trei bad ban ai ïa kaba bha tam kaba ki paidbah ki la bynshet ki tyrpeng jong nga kum u nongmihkhmat ban pyndep hok ïa la ka jingshakri na ka bynta ban wanrah ïa ki song pynroi hapoh ka Constituency bad ban kren ruh ïa ki mat ki jura kiba ïadei bad ka jylla. Nga la pyrshang hi ban pyndep la ka jong ka kamram bad nga ai khublei ïa ki paidbah kiba la ai ka jingkyrshan,” u la ong.
Haba kylli, u la ong, “naduh ba nga la rung sha ka jylli jong ka saiñpyrthei nga la pyrshang ban bat ïa la ka jong ka nongrim lane ban kynriah noh na ka nongrim kaba nga ladep pynpaw sha ki paidbah kaba nga la kren ha ka rynsan elekshon. Shwa bga ngan shim ïa ka rai (ban pynïasoh bad ka VPP) baroh ki tip ïa ka jinglong jingman kiba ïadei bad ka KHNAM.”
U la pynpaw ruh ba ka Voice of the People Party ka dei ka seng riewlum kaba wat ka North Shillong Constituency kaba don ïa ki nongthep vote ba ïakhleh jaidbynriew ruh ki pdiang ïa kane ka seng saiñpyrthei ba la pynkha dang shen hapoh ka jingïalam jong u Bah Ardent M. Basaïawmoit.
U la ong ruh ba ka jingbym noh mynsiem shuh sha ka KHNAM ka dei namar ka jingmih ki kynrum kynram kaba um sngew don jingmyntoi eiei ruh em bad ka jingmih noh na ka KHNAM ka long namarba u don ka thong ban peit jngai ïa ki kam kiba ban wan nangne shakhmat khamtam eh ïa ka jinglong jingman ha ka Jylla.
U la ïathuh ba shwa ban un pynïasoh bad ka VPP u la dep tyrwa ïalade ha kiwei ki seng saiñpyrthei ryngkat bad ki nongrim hynrei kiba bun ki la kyntait bad dei tang ka VPP kaba pdiang ïa ki nongrim jong u Bah Adelbert kaba pynlong ruh ïa u ban rung sha kane ka seng saiñpyrthei.
“Nga don ka jingshahniah kaba skhem ha ki paidbah, ba kin dang pynjop biang ïa nga ha kane ka kynti khnang ba ngan dup lah ban bteng ïa ki ishu kiba nga ladep kren,” la ong shuh shuh u Bah Adelbert.

Leave A Reply

Your email address will not be published.