Pyllait paidbah ka NPP ïa ka kaiphod treikam 2018-23, pan jingkyrshan ban ïoh thaw sorkar biang

Shillong, K’Lyngkot 12 : U National President ka National People’s Party (NPP) Conrad K Sangma u ba dei ruh u Myntri Rangbah ka jylla ula ong ba ka sorkar jylla ba ïalam daka NPP kala wanrah shibun ki plan bad ka la pyntreikam shibun ki skhim, projek bad ki prokram naka bynta ban pynsted ïa ki kam pynroi hapoh ka jylla.
Haba kren ha ka jingïalang paidbah jong ka NPP halor ka mat “Stronger Together” ne “Ka Bor Bakhlain Ban Iadonlang”, ba la pynlong ha Madan Polo, u Conrad ula ong ba ki kam pynroi hapoh ka jylla kila kiew sted bha ha kine ki 5 snem.
Ula ïathuh ba ka jylla kala kiew ha ki thup naduh ki Social Sector bad ki jingtei jingshna ia ki surok ki ïing ophis ïing skul bad kiwei kiwei (Infrastructure) hapoh ka jylla.
“Ka sorkar jylla ba ïalam daka NPP ha kine ki 5 snem kala wanrah shibun ki kam pynroi lada ïa nujor ïaki kam pynroi ba kiwei ki sorkar kila wanrah ha ki 50 snem ba ka jylla kala dap” la ong u Conrad.
Ha kane ka sngi u Myntri Rangbah ula pyllait ruh ïaka kaiphod treikam jong ka sorkar jylla naduh 2028-2023 bala ai kyrteng Promises Delivered’ ha ka jingdon lang u National Vice President ka NPP bah Prestone Tynsong, u National Treasurer James K Sangma, ki MP ba kynthup ka Agatha K. Sangma bad u Dr. W.R. Kharlukhi.
Nalor kane ka NPP hynne ka sngi kala pynbna ruh ïaki kyrteng jong ki 58 ngut ki kyrtong ki ban ïakhun ha kane ka ilekshon ban wan.
Haba pynkynmaw ïa u Purno Agitok Sangma (Bam Kwai Dwar U Blei), u heh ka NPP ula ong ba ka NPP kala shakri ïaka jylla daka thong mynta la 5 snem bad ka la lah ruh ban shim ïaki mat kum ka jingïakren pynbeit pud bad ka Assam bad dei tang ka NPP hi kaba nud ban shim ïa kum kine ki mat ban pynbeit.
“Lada don kano kano ka Party kaba nud ban pynbeit ïa u pud u sam, ka dei hi ka NPP bad nga kular ha phi ba lada ka NPP ka ïoh ban thaw sorkar marwei hadien ka ilekshon, ka sorkar kan ïaid shakhmat ban pynbeit noh ïa u pud u sam bad ka Assam” la ong u Conrad.
U Conrad ula ong ba ka ilekshon 2023 ka long kaba kongsan namar kadei hadien ka jingdap 51 snem ka jylla Meghalaya bad naka liang ka party ruh ka don ïaka thong ban shakri ïaki paidbah bad ïaka jylla.
Haba buh ka jingkylli sha baroh, ba balei donkam ban thaw sorkar marwei, u Conrad ula ong ba ka jylla ka donkam ban ïoh daka sorkar ba marwei bad naka liang ka NPP kan lah ban buh maw nongrim naka bynta ban trei ha ki 50 snem ban pynthikna ban pynurlong ïaki mat jingdawa ki paidbah bad ka jylla.
“Kum ki paidbah ka jylla donkam ban shaniah ïaka NPP kaba la lah ban pynurlong ïa bun ki jingkular ha kine ki 5 snem bad lada ka NPP ka ïoh ban thaw sorkar marwei, kan plie lad ban trei naka bynta 50 snem naka bynta ban pynurlong ïaki mat jingdawa jong ki khun samla, ki longkmie, ki nongrep bad ki paidbah” ula bynrap.
U Conrad ula pynpaw ba ki paidbah ki ap sa ïa ka sngi thep Vote namar ki kwah daka sorkar kaba khlaiñ bad ula pynpaw ruh ka jingthikna ba ki paidbah kin ai ka jingkyrshan ba pura ïaka NPP naka bynta ban lah ban trei naka bynta ka bha ka miat ki paidbah.
Ula ong ba ka NPP kan pynthikna ba kiwei ki jylla ka thaiñ shathei lam mihngi ki bud nuksa ïaka Meghalaya bad mano mano ruh kin nym lah ban peit poh ïaka jylla hynrei kin hap bud nuksa kylla ïaki kam ba ka sorkar jylla ka leh naka bynta ki paidbah bad ka jylla.
U ma Sniawbhalang Dhar MLA ka Nartiang bad Myntri ka sorkar u la ong katba nang shah kynnoh ka NPP lai phew jait lait phew rukom katta ki paidbah ki dang wan ban pynïasoh sha ka party namar ki tip bad ïohi ba ki jingkynnoh kim long kiba ym don nongrim bad ki ïohi ruh haduh katno ka sorkar MDA hapoh ka jingïalam ka NPP ka la trei ban wanrah ïa ka roi ka par ha ka jylla. U la ong hapoh kine ki san snem ha ka jingïalam u Conrad K Sangma kum u Myntri Rangbah ym don jingduh thiah duh dem halor ka jingïaknieh nongïalam bad ka daw ka long ba u dei u nongïalam uba tbit bad lah ban tehsong lut ïa baroh. U la kyntu ïaki paidbah kumba ki la wan ban pynshisha mynta ka sngi ïa ka jingshaniah ïa ka party NPP kumta ruh ai ka jing kyrshan ba pura ban wanrah ka jingjop ba don burom bad ban ïoh thaw ïa ka sorkar tang da ka NPP marwei khnang ba kan ai ka jingshar kaba pura ïaki paidbah.
Kumban shu pynkynmaw ba kumba 10 ngut ki kyrtong ba ka NPP ka pynbna hynne ka sngi kidei ki kyrtong kiba la wan na kiwei ki sengsaiñ pyrthei kynthup naka Congress bad TMC.