Shillong, Nailar : U MLA ka Mawlai u Bah PT Sawkmie hynne ka sngi u la pynpaw ba kham ñiar ban don ki briew ha kine ki sngi kiba mynta ban pyrkhat na ka bynta kiwei ha kiba bun ki bynta.
“Kham ñiar ban don ki briew kiba pyrkhat ban ïarap ïa kiwei ha kine ki sngi kiba mynta, namar kiba kham bun hi ki pyrkhat tang na ka bynta ïalade,” ong u bah PT Sawkmie haba kren ha ka jingïalang hadien ba la dep plie ïa ka ophis jong ka Kynhun Synroplang Organisation ha Mawlai Phudmuri.
U la bynrap, “Hynrei kaba kmen pat ka long ba kine kiba pyrkhat ïa kiwei ki ïoh ïa ka jingkyrkhu na U Blei bad wat ka Ktien jong U Blei ruh ka kren shaphang ki jingkyrkhu haba lehbha ïa kiwei.”
Nalor kata u la pynpaw ka jingsngewkmen ba ka Kynhun Synropalang ka la wan buh ophis ha Mawlai na ka bynta ban ïarap ïa ki paidbah ka East Khasi Hills District, kumjuh a ka Mawlai.U kyrmen ba kane ka seng kan ym kut tang shipor hynrei kan ïai bteng ban shakri ïa ki paidbah ka thaiñ.
Ha kane ka sngi la don lang ruh u bah M. Kharkrang, u heh pulit ba la shongthait bad uba la bna ba un ïakhun ïa ka ilekshon na North Shillong (Jaiaw) konstitwensi, uba la ai jingkren bad pynpaw, haba ka seng ka don ïa ka jingthmu kaba bha U Blei un sa ïalam lynti ïa ki, khamtam haba ki kam ba ki trei ki long kiba khuid ba suba bad kiba ïoh ïa ka jingshaniah na ki paidbah.
Na ka liang u president ka Synroplang u bah Robin Diengdoh u ïathuh ba ka jingthmu jong ka seng hi ka long ban ïarap ïa ki duk ki suk hapoh ka thaiñ, khamtam hapoh kane ka East Khasi Hills District.
Katba na ka liang u secre tary bah Ryan Phanbuh u la ai khublei bad pynpaw ka jingsngewnguh ia u MLA uba la nohsynniang ia ka duli, ka miej bad ki shuki na ka bynta ka ophis.
Ha kane ka sngi la ïoh ruh ka jingkren na u bah Homer Kharkongor, Presi dent ka UDP Mawlai Circle bad na bah Wanseng Jyrwa, Working President ka UDP Mawlai, kiba la kitbok ïa kane ka organisation bad kyrmen ba kin ïohi ïa kiba ki trei hok bad trei shitom ha ka kam jong ki.
