Shillong, Nailar : ïa ka kot niam kaba kyrteng “Eloi Eloi Lamma Sabakthani” ba la thoh da u da I Bah PS Giri la pyllait paidbah da u Bah AL Hek MLA ka Pynthorumkhrah ha ka 18 tarik mynta u bnai ha ka jingïalang kaba la long hapoh ka skul OK Pynthor Sohma Tynring Secondary School ha ryngkat ka jingïadon lang u MLA ka Umroi constituency u Bah George B.Lyngdoh.
Kiwei pat kiba la ïa don lang ha kane ka sngi ki kynthup ruh ia ki Rangbah Shnong jong ka Nongrah u Bah BG Lapang, Bah SR Nongshli RS Jaiaw Pdeng umroi bad Bah PS Sohtun RS ka Lumdiengngan bad ki nonghikai bad principal jong ka Modern Secondary School Lumsohpieng, president ka seng Hill Farmer Union, Ribhoi, ki nongïalam ka seng HNYF Ri Bhoi bad kiwei kiwei ki riew rangbah.
Baroh ki nongkren ha kane ka prokram kila ai ka jingïaroh ïa u nongthoh ym tang ha kaba ïadei bad ka khubor na ka ktien ka jong U Blei, hynrei ban nangkyntiew bad pynïar shuh shuh ïa ka ktien khasi ha ka liang ka thoh ka tar.
Na ka liang u nongthoh ha ka jingkren u la ïathuh ba ka la shim por lai bnai ban pyndep ïa kane ka kot, bad ula ïathuh ruh ba ula thoh ha katei ka kot katkum ka jingbatai halor ki hynñiew tylli ki mat, kata ka jingïap, ka jingmihpat, ka jingbishar, ka jingwan, ka jingpynkhreh bad ka jingkular.
La pynphuh pynphieng shuh shuh ïa kane ka sngi da ki jingrwai na ki khynnah skul jong katei ka skul OK Pynthor Sohma ha ryngkat ka jingïadon lang i trai jong kane ka skul IKong Brianda Kharkongor.
Ha kane ka juh ka sngi katei ka skul Pynthor Sohma ka la pynkup burom ruh ïa uwei u Rangbah uba la pynïoh Hill State, kata u bah Kalming Rympeit uba dei na ka shnong Mawtneng uba la shah set phatok haduh 30 sngi ha Assam namar ka jingïakhih ban ïoh noh la ka jong ka jylla.
La pynkup burom ïa une u riew rangbah da ka ryndia kum ka dak ban sah jingkynmaw.ïa kane ka jingleh burom la pynkup da i trai jong kane ka skul i Kong Brianda Kharkongor. Nalor kata kala don ruh ka jingot ïa u cake halor ka jingdap 67 snem jong u nongthoh jong kane ka kot.
