Nongpoh, Nailar 05: U Bah Pyniaid Sing Syiem CEM ka KHADC mynta ka sngi u la kular ban ai 10 lakh haka jingrakhe dap 1 snem ka Jingaiei Rehabilitation Center haka shnong Syad Rit kaba dei ka jaka sumar bad syllok ïakiba la ngop bad kyrni haki jingdih buaid khamtam u drok kaba la pynïaid bad khmih da ki nongïalam ka Balang u Blei Meghalaya bad Assam naka bynta ba kin dang lah ban pynbha bad pynheh ïa katei ka jaka ai jingsumar.
Na ka liang u Bah Pyniaid Sing Syiem haba leit ban shim bynta ha katei ka jingrakhe dap 1 snem u la ong ba kam long kaba suk ban pyniaid ïaki jaka sumar bad syllok naka bynta ki samla kiba la ngop bad kyrni haki jingdih buaid, khamtam ban pynkylla dur ïaki, hynrei da ka mynsiem ka jinglen lade ka jingïaishah bad ka jingtrei shitom katei ka jaka sumar mynta kala ïaid lynti u mawmer ba 1 snem.
Ha katei ka jingrakhe dap 1 snem ka Jingaiei Rehabilitation Center, la don lang naduh ki Pastor, kiba kynthup ia u Pastor GA Kharshïing, u Pastor M Shangpliang, u Pastor R Imiong, Pastor AM Mihsil, Pastor K Nongpluh, ki nongshah sumar ha kane ka jaka lem bad kiwei ki para ba ngeit ka Balang U Blei.
Ki Pastor jong ka Balang u Blei, ki la pyntip ba katei ka jaka sumar ka dei ka jaka ka ban ai jingsumar tang na bynta 10 ngut ki briew, hynrei kumba ka long mynta, ki don haduh 12 ngut, naba ar ngut la pdiang iaki hadien ka jingpyrkhat sani bad ka jingdonkam ban ai ia ka jingsumar iaki ba kin ioh ia ka jingim kaba thymmai bad hapdeng ka jingiaid lynti ki mad bad kynduh shibun ki jingeh bad don ki khep ka jingduh mynsiem kaba khraw, hynrei dei ka bor jong u Blei bala ialam lynti ïaki ban nang jam shakhmat ban ai ka jingshakri naka bynta ki paralok kiba la n gop haki jingdih buaid ba kin ioh pat ban kylla bad im ka jingim kaba thymmai.
Shuh shuh u Conrad K Sangma u la pynmang T. 5 lak na ka skhim Chief Minister Special Development Fund sha katei ka Center naka bynta ban thied Generator kumba katei ka jaka haduh mynta kam don bording elektrik.
