Shillong, Nailar 05: Ka Dorbar Shnong Malki ha ka kyrwoh khubor ka la pyntip ba kan pynlong ïa ka jingjied Rangbah Shnong ba thymmai ha ka 10 tarik mynta u bnai ha kaba kane ka jingïalang kan sdang naduh ka por 9 baje mynstep haduh ka por 2 baje nohphai sngi ha Madan Malki.
La ong ba ka jingñiew vote kan sdang naduh ka por 3 baje nohphaisngi bad la kyntu ïa baroh ki nongshong shnong kiba la kynjoh ïa ka 18 snem shaneng kidei ban wan bad ban jied ïa u rangbah shnong ba thymmai.
Ha kane ka sngi jong ka jingjied ïa u Rangbah Shnong ba thymmai kan long ruh lyngba ka Ballot Paper ba la pynkhreh da ka election Committee. Ha kane ka sngi thep vote kan don ka jingkhang shnong kaba tang shipor khnang ban lah ban ailad ïa ki nongshong shnong ban ïoh ka lad ban thep vote. Na ka liang ka Election Committee ka la kyntu ïa baroh ki nongshong shnong ban ïamih ryntih ha kane ka sngi khnang ba ka prokram ba la buh da ka shnong kan long kaba ïaid beit iaid ryntih, ong ka kyrwoh na u Bah Anthony N Nongbri Secretary Election Committee Dorbar Shnong Malki.
