Jowai, Nailar 05: U ma Sniawbhalang Dhar uba dei ruh u symbud myntri rangbah ka jylla, ha kane ka 3 tarik u Nailar, 2024 ula hiar dalade ban leit jngoh ïa ka Ïew Muchai kaba don ha ka shnong Mynsngat West Jaiñtia Hills Meghalaya.
Kane ka ïew kaba dang shu sdang thymmai ha u snem 2022 kaba hap hapoh ka jingpeit jong ka shnong Mynsngat bad ka District Council, ka dei kaba shait long shisien shi taiew ha ka sngi Muchai, katkum ka rukom kheiñ sngi ïew ki nong Jaiñtia.
Ha kane ka sngi, la synrang lang ïa u symbud myntri rangbah da ki nongïalam shong bad ki riew rangbah jong ka thaiñ.
Ha kane ka jingleit jngoh u symbud myntri rangbah. Ula ïoh lad ban ïa syllok bad ki nongshong ïew, ban sngap ïa ki jingeh jong ki bad kumjuh ban sngap ïa ka jingai jingmut jong ki kumno ba pynbha shuh shuh ïa kane ka ïew bad ka khaïi ka pateng ha kane ka thaiñ.
Haba kren bad ki nong shong ïew, u ma Sniawbhalang Dhar, ula ong, ka 1-Nartiang Constituency ka long kaba donbok shibun eh, namar ka lah don haduh kumba 6 tylli ki ïew bad kane kan plie lad plie lynti ia ka khaii ka pateng ka ban pynkiew ïa ka ïoh kam ïoh jam bad ka ïoh ka kot jong ka thaiñ hi baroh kawei.
