Shillong, Nailar 05: U Lat jong ka jylla u C H Vijayashankar hadien ba u la shim ïa ka jingbam smai u la leit ban ïa kynduh ïa u Myntri Rangbah duh jong ka Ri India u Narendra Modi ha ophis treikam jong u ha Nongbah Delhi kane ka jingïakynduh ka long kum ka jingburom ïa u Myntri Rangbah duh ka ri.
Ka khubor ka iathuh ba kane ka jingïakynduh ïa u Myntri Rangbah duh jong ka Ri India ka long hadien ba la kut ka jingïalang kaba ar sngi jong ki Lat ka jylla ha Rashtrapati Bhavan kaba la khot da ka President jong ka Ri India ka Droupadi Murmu ha kaba la leit ban ïashim bynta.
Ha ka jingleit jong u Lat ka jylla sha Nongbah Delhi tang hadien shi sngi ba la dep ban bam smai u la ïa kynduh ruh ïa u Myntri Kam Poh Ïing ka Ri India u Amit Shah ha ka sngi ba poi sha Delhi shwa ban don kane ka jingïalang ki Lat ka jylla.
Ha kane ka sngi kiwei ki Lat jong ki jylla kiba la leit ban ïa kynduh ïa u Myntri Rangbah duh jong ka Ri India hadien ka jingïalang ba la long ha Ïingsah jong ka President.
Ki Lat kiba la leit sha ka jingïalang ki long u Lat ka jylla Telangana u Jishnu Dev Varma, u Lat ka jylla Jharkhand u Santosh Gangwar, U Lat ka jylla Chhattisgarh, u Ramen Deka, u Lat ka jylla Sikkim u Om Prakash Mathur, bad u Lat ka jylla Rajasthan u Haribhau Kisanrao Bagde bad kiwei kiwei pat.
