Shillong, Nailar 05: Kum ka jingkitkhlieh ban sumar ïa ka Mei mariang ba kan long kaba khuid bad kaba itynnad kawei na ka kynhun Seng Samla ba la tip kum ka ASEZ WAO kaba dei ruh jong ka World Mission Society Church of God ha ka 5 tarik u Nailar, 2024, ka la pynlong ïa ka kam treimon sngewbha kaba la tip da ka Worldwide Cleanup Campaign Green Earth ban pynkhuid ïa ki bynta ka sor Shillong na Khyndailad, GS Road, haduh Motphran.
Ha kaba ïadei bad kane na ka liang u Bah Basanki Dkhar u la ong ba ka jingthmu jong ka ASEZ WAO kum ba la ïa tip ba ha ka ktien nongwei ASEZ ka mut ban pynneh ïa ka mariang naduh kaba sdang haduh bakut bad ka kyntien WAO ka mut shi ïing shi sem. U la ong ruh ba ka jingthmu ka long ban leh bha ïa kiwei kum ba la ieid ïalade.
U la ong ruh ba ka jingsdang ban pynkhuid mynta ka sngi ka la sdang naduh khyndailad bad pynkut pat ha Motphran. U la ong ruh ba dei ban pynlong ïa ka Meghalaya kaba jyrngam bad kaba khuid.
Ha katei ka jingtreimon sngewbha ka ASEZ wao la wan ban ïadonlang da u Bah Everson Kharnaïor, Supervisor ka Shillong Municipal Board bad ka Kong Sukhi Pariat, President ka Seng Longkmie na Wahthapbru kaba dei ruh ka President ka Mahila Morcha ka Bharatiya Janata Party (BJP) Meghalaya.
