Ktah jur ka dheng kali ha surok NH ha Narpuh EJH namar ba twa ka khyndew ktieh ha Kuliang

Khliehriat, Nailar 05: Na ka daw ka jingtwa khyndew ktieh na shnong Kuliang ha kaba ka khyndew ktieh, ki maw, ki dieng ki la hap sha surok national highway bad ka la don ka jingdheng kali kaba jur bha ha ka thaiñ, don ruh kawei ka kali rit kaba la shah tap ha ka khyndew ktieh, kane ka jingdheng kali ka la neh bun bun kynta naduh hynnin mynmiet bad ka la ktah haduh katta katta ïa ka leit ka wan jong ki paidbah kiba iaid lyngba na ka surok national highway na Kuliang.
La ong ba katei ka jingtwa khyndew ka la jia naduh hynnin mynmiet bad ki nongtrei jong ka NHAI ki la iakhun shitom ban pynkhuid ïa ka khyndew ktieh, ïa ki dieng, ki maw kiba kah ïa ka lynti iaid ki kali, la sngewthuh ba ki kali ki la sahkut naduh hynnin mynmiet ha ka jingdheng kali ha ka thaiñ.
Haba peit ia ka jinglong jingman ka surok ruh ka la nang sniew bha mynta ha ka thaiñ Narpuh bad ka buh jingma bad buh jingeh haduh katta katta ïa kiba leit ba wan, ka surok ka la i kum ka surok khlaw ka bym idei shuh kum ka surok national highway kaba la dap sa tang ki thliew kiba heh kiba dap da ka um ktieh ha baroh shilynter ka surok bad lah ban ong ba ka jinglong ka surok ka buh jingeh haduh katta katta wat ïa kiba ñiah kali khamtam ki kali rit bad ki kali heh kiba kit jingkit.