Ba mih ka jingïaheh ktien hapdeng u Doktor bad ka nongwan shim dawai, leit tuklar ka KSU, HANM, HYC

By Mawphor News Desk On Aug 6, 2024

Mawkyrwat, ‘Nailar 05: Ki saw tylli sengbhalang ba kynthup ïa ka KSU, HANM, HYC mynta ka sngi ka 5 tarik u ‘Nailar, 2024 hadien ba ki la ïohi ïa kawei ka video kaba la saphriang ha ki rynsan social media kaba ïa dei bad ka jingjia hapoh Civil Hospital Mawkyrwat, South West Khasi Hills District ki la pynpaw ka jingsngewkhia bad mar mar ki la leit ban ïa kynduh ïa ki bor ba dei peit ban tip ïa ka jingshisha bad kaei kaba la jia.
Lah ban kdew ba ka jingïaheh nia ka long hapdeng u doktor jong ka Civil Hospital Mawkyrwat bad kawei ka longkmie na ka shnong Phottdei, South West Khasi Hills District.
Kumta halor kane ka jingjia, ka KSU jong ka Mawkyrwat Circle lyngba u bah Plosbor Kharjahrin uba dei u General Secretary haba kren ha ki lad pathai khubor u la ong ba halor ka jingsaphriang kawei ka video kaba la paw ba ka la don ka jingshah kren tohmet kawei nongpang ha u Doktor ha Civil Hospital Mawkyrwat. Na ka liang ka KSU mar mar ki la leit ban ïa kynduh bad kylli ïa kane ka jingjia na ki nongpeit jong katei ka jaka sumar bad ruh na u Doktor.
Ym tang kata, na ka liang ka KSU ka sngewkhia ïa kane ka jingjia namar ka dei tang ka jingbym ïa sngewthuh ktien hapdeng ï nongwan shim dawai bad u Doktor. Namarkata, ka KSU kam pynrem ïano ïano ruh halor kane ka jingjia hynrei ka kyntu ïa paidbah jong ka dong ka thaiñ kumjuh ruh ïa ki nongtrei hapoh ka Civil Hospital Mawkyrwat ba nangne shakhmat kin ïa burom lem markylliang la ka long ka ha ktien ka thylliej bad kiwei de ki kam khnang ba kan nym mih biang kum kane ka jingjia.
Katba na ka liang ka HANM lyngba u President ka HANM, South West Khasi Hills District hadien ka jingleit ban ïa kynduh ïa u Doktor ki la ïoh jingtip ba ka la don ka jingïakren tohmet markylliang kata hapdeng jong ka nongwan shimdawa bad u Doktor namar u Doktor ruh ha ka jingbunkam ban sumar ïa kawei ka longkmie ba ar met bad iwei na ki nongpang ba shitom jur ban thoh ïa ki kot ki sla ban phah kit noh sha Shillong.
Namarkata, kum ka seng kam don jingkynthoh ïano ïano hynrei ki buh tang ka jingkyrpad rit la ka long ïa ki nongwan shim dawai ne wat ïa ki Doktor bad kin don ka jingïaburom markylliang ha ka ktien ka thylliej. “U thylliej uba pynbha, bad u thylliej uba pynsniew”, kumta da ïa kren antad bad tynkan ong u President ka HANM, South West Khasi Hills District.
Ka HYC South West Khasi Hills District pat, ka la pynpaw ba halor kane ka jingjia ym lah ban sngewthuh namar ki la don ka jingïakynnoh mar kylliang, hynrei kaba kongsan ka long ba lada bakla na kano ka liang ruh ki dei ban ïa pan map mar kylliang khnang ba kan ymdon shuh kiba kum kine ki jingjia nangne shakhmat.
Ha kawei pat ka liang, ka HYC lyngba u Pynskhem Kharjahrin, Education Secretary ha ka jingïakren u la ong ba kane ka jingshah kynthoh kam dei shuh ka sien ba nyngkong hynrei ka la jia bunsien pynban ha kiwei ki sngi kam paw paidbah. Namarkata, ka HYC ka la buh jingkyrpad ba kum ki nongai jingshakri ïa ki paidbah ki dei ban sngewthuh ïa kata ka bynta ym ban shu kren tohmet ne leh tohmet la ha ka ktien ka thylliej bad wat ha ki kam ruh.
Kumta, kawei pat ka bynta ba ka HYC ka la leh halor kane ka jingjia mynta ka sngi, ka long ba ki la khot baroh ar liang kata ïa u Doktor bad ka longkmie ba wan shim dawai bad phah pan map markhmat khnang ba nangne shakhmat kiba kum kine ki jingjia kin nym jia shuh.