Nongstoiñ, Nailar 05 : Namar ka jingïoh rung lait lan jong ki bar jylla bad wat ki bar ri kiba dei na ka ri Bangladesh ha ki ba baun ki jaka hapoh West Khasi Hills District, ki nongïalam ka Hynñiewtrep Youth Council West Khasi Hills mynta ka lah sngi u Blei, ki la leit ban ïakynduh ïa u bah Garod L.S.N Dykes Deputy Commissioner ka West Khasi Hills bad ki la aiti ruh ha u da ka jingthoh ban kyrpad ïa u kum u khlieh ka district ba un shimkhia halor katei ka mat.
U Samla Wanteibok Lyngdoh General secretary ka HYC West Khasi Hills, haba ïakren bad ki lad pathai khubor hadien ba ki la mih na ka ophis treikam jong u Deputy Commissioner, u la ong ba hadien ba ka seng ka la ïohi na ka por sha ka por lyngba ki video kiba saphriang lyngba ki social media, ha ki don bun bah ki bar jylla bad wat ki bar ri ruh kiba la ïoh lad ban rung hapoh ka district, tang namar ba ki don ïa ki Electoral roll Photo Identity Card bad ki Aadhaar card, wat lada kim don ïa ki work permit bad ki labour licence, trading licence bad kiwei kiwei ki kot ba donkam, kum ki jingpynshisha na ki bor pulit la ki dei kiba don dak sniew ne em hapoh ki shnong ki thaw ka buh ha ka jingma kaba khraw, namar ïoh lehse lada ki dei kiba don dak sniew lada ki wan trei bylla ne wan rung hapoh ki shnong ki thaw kin sa leh ïa ki juh ki kam sniew bad wat kiba kham palat ruh.
Utei u nongïalam ka seng u la ong ruh ba dei halor kitei ki mat, ba ka seng ka sngewkhia bad ka shim ïa ka jingkitkhlieh ban leit ïakynduh ïa u Deputy Commissioner kum u khlieh ka District bad ban ai ha u da ka jingthoh ba un shimkhia halor katei ka mat.
U la ong ruh ba ha ka jingïoh rung laitlan jong ki bar jylla hapoh ka District ban khaïi ban pateng bad ban wan trei bylla, ka dei ruh na ka jingbym don ki aiñ kiba khlaiñ ha ka tnad Labour Department kaba ki lah ban pynshitom ïa ki bar jylla ki bym biang ïa kitei ki jingdon kam ba la kdew.
Ha kajuh ka por u la ong ba ka seng ka la kdew ruh ha ka jingthoh ba dei ban pynkhlaiñ ïa ki pulit jong ka tnad Infiltration kiba don ha khappud bad ban ai bor ruh ha kiba kin talasi bniah bha bad ban check nadong shadong ïa ki bar jylla haba ki thmu ban wan rung hapoh ka district lyngba ki khyrdop ba ki la pynïeng ha surok na ka bynta ban talasi.
Shuh shuh u la bynrap ba kumba ka long baroh shi katta ki bar jylla kiba wan rung hapoh West Khasi Hills District ki kham ïoh lad eh ban rung na ka surok Kamphaduli sha Mawsikar lyngba ka Langpih, namar ha Kamphaduli wat la ka dei kaba don ha khappud bad ka Assam ruh ka sorkar jylla Meghalaya kam pat buh Infiltration check gate haduh mynta.
U la ong ruh ba wat la katei ka jaka ka dei ka bym shym pat la ïapynbeit satia bad ka sorkar Assam ruh kat kum ki jingpynshisha na ki Electoral roll katei ka jaka ka dang hap ha West Khasi hills lait noh sha shiliang ka jingkieng jong ka wah Synthi.
Khatduh eh u la ong ba lada ki bor pynïaid district kim shim khia halor kitei ki mat ba ki la dawa. Ka seng kan sa lum ïa ki paitbah nongshong shnong jong ka district ban ïa pyrkhat kum no kin leh bad da kino ki lad ki lynti kin shim ban pynsngewthuh ïa ka sorkar.
