Ka kamram ki longkmie kam dei ban kut tang hapoh ïing shet ja : Macdalyne S Mawlong

Nongpoh, Lber 08: Kum shibynta ban snohkti lang haka jingrakhe ïaka sngi ki longkmie ne ka International Women’s Day, ka kynhun ki longkmie, Ki Kjat Sngi Jingkyrmen CLF ba kdup ruh ïaki VO bapher bapher, ba hap ha Myrdon Nongbah mynta ka sngi kala shim ïaka sienjan ban rakhe ïaka sngi ki longkmie haka jingïalang kaba shongkun kaba la long ha Umran Ñiangbyrnai.
Ha katei ka sngi ka kong Macdalyne S Mawlong MDC ka Umsning kala shimbynta kum ka kongsan haka jingdonlang ka kong Violet Mawlong President Ki Kjat sngi Jingkyrmen, u Tamzalian Tomging District Mission Manager ka NABARD, Bah S Kharbani Rangbah Shnong, ki longkmie naki Village Organization bapher bapher lem bad ki nongtrei jong ka Umsning C&RD Block.
La pynphuh pynphieng ruh ha katei ka sngi da ki jingrwai bad jingshad, ki skit bala shim bynta da ki longkmie kum ka jinglehkmen ïa katei ka sngi ba kyrpang jong ki longkmie.
Haba kren ha katei sngi naka liang ka Kong Macdalyne S Mawlong kala pynpaw ka jingsngewkmen kaba khraw ha kum katei ka sngi kaba dei ka sngi ba kyrpang jong ki longkmie bad ai khublei ruh ïa baroh ki para longkmie kiba don ka jingkitkhlieh kaba khraw naduh iing haduh bar ban pynbiang ïaki jingdonkam bad wat haka imlang ka sahlang.
“Kum ki longkmie ka kamram kam dei ba ngin kut tang haki saw kynroh jong ka ïing shet ja hynrei sngew sarong ba ha kane ka juk ba mynta ki longkmie ki mih shakhmat ha baroh ki liang ban kit ban bah, ban shakri ïaka imlang ka sahlang bad ka jaitbynriew, kumba la pynkup bor haki” la ong ka kong Macdalyne da kaba bynrap ruh ba ki longkmie nalor ka kam iing kam sem ki don ruh ka bynta kaba khraw haka imlang ka sahlang khamtam ban wanrah ïaka bha ka miat, ban rat diengkhong ïaki kam sniew kam smeh ba ki khun ki skiew kin ïaid haka lynti kaba dei.
Kala ong ruh ba haka jingshakri jong ka kum ka MDC kala lah ban ai mynsiem ïaki para longkmie jong ki Village Organisation bapher bapher ba kin mih shakhmat, namar ba haki por ba mynshuwa kim ju nud ban mih namar ki tieng ba ioh don ka jingkdew kti, ka jingkren jingkhoh, ka jingrkhie beiñ ka jingrit mynsiem aiu kiwei ki peit lada ki longkmie ki mih shakhamt hynrei ka burom, ka long ïaki para longkmie kiba long shlur kiba mihshakhmat ban trei naka bynta ka imlang ka sahlang ban noh synñiang ïaka jingshakri jong ki, khamtam kum kawei naki longkmie kaba mihkhmat sha ka District Council na Umsning kala lah ruh ban pynrulong ïaka Land Bill ba ki paidbah ki lah ban register ïaka khyndew ka shyiap ka jong ki ha District Council kaba long ka jingjop bad ka jingsarong kaba khraw ïaki paidbah ka jylla.