Shillong, Lber, 08: Ka West Garo Hills District ha ka sngi Baar ka la rakhe ïa u bnai ban ïakhun thma pyrshah ïa ka jingpang Tuberculosis da kaba ïasnohkti ryngkat lang bad ka pyrthei baroh kawei ha ka jingïalang kaba la long ha Darengre PHC kaba hap hapoh ka Gambegre Block, West Garo Hills halor ka phang “YES! We Can End TB”.
Haba kren ha knae ka sngi, ka Horticulture Development Officer jong ka Gambegre C & RD Block, ka Flamia Chimachi R Marak ka la ïathuh ba ka Sorkar India ka la pyrshang katba lah ban pynkut noh ïa ka jingpang TB ha kaba kut jong u snem 2025 ha ka ri India baroh kawei bad namarkata ka la kyntu ïa ki nongpang TB ba kin ai ka jingïatreilang bad ban shim ïa ki lad jingsumar ban ïoh jingpynkoit na kane ka jingpang. Ka la kyrpad ruh ïa kito kiba don ïa ki dak ki shin jong kane ka jingpang ki lah ban leit mih sha ki jaka ai jingsumar kiba marjan khnang ba kin ïoh jingsumar kham kloi bad ban ïada na ka jingsaphriang jong u khniang jingpang sha kiwei pat ki.
Ha kajuh ka por, ka District Tuberculosis Officer jong ka West Garo Hills ka Dr. E A Sangma haba kren ha kane ka jingïalang ka la pyntip ïa ka thong ba ka Sorkar India ka la buh ban pynkut noh ïa ka jingpang TB ha kaba kut jong u snem 2025 bad bynrap ba kane ka prokram ka long ban jop ïa ka thong “ka India kaba lait na ka jingpang TB’ da kaba ïada, ban lap, ban sumar bad ban tei ïa ki para na ka bynta ka jingai jingïada ïa baroh da kaba ai jingsumar ei ïa ki nongpang ha kylleng ka ri baroh kawei lyngba ki shlem ai jingsumar jong ka Sorkar.
Ka la ïathuh ruh ba ha une u ‘nai Lber la buh hakhmat ban pynshai bad ban ïalap paidbah saphang ka koit ka khiah, ka jingïakynduh jingeh ha ka ïoh ka kot na ka jingshah ktah ha ka jingpang TB bad ban shim ïa ki lad ki lynti ban pynkut ïa ka jingpang TB ha ka pyrthei baroh kawei.
Da kaba ïathuh bniah shaphang kane ka jingpang, ka Dr. Sangma ka la batai bin pa bin ïa ki dak ki shin kiba pynpaw ïa kane ka jingpang bad ka jingsumar ïa ki nongpang TB bad ba ka Sorkar ruh ka ai ïa ka jingsumar ei naduh kaba iang ïang ïïa ki jingbam teimet sha ki nongpang.
Ha kane ka sngi, ki nongpang kiba la ïoh jingkoit ki la ai sakhi bad kumjuh ruh na u Treatment Supporter jong kane ka thaiñ.
Kum shi bynta ka jingpyntreikam ïa ka National Tuberculosis Elimination Programme Nutritional Support, la sam ïa ki jingbam teimet sha ki nongpang.
U Senior Medical and Health Officer, DR-TB Centre, u Dr. K A Sangma, u Block Programme Manager ka NHM, Gambegre Block bad ki paidbah ki la ïashim bynta lang ha kane ka sngi.
