Guwahati, Lber 08 : Ki bor pulit ka tnat Railway mynta ka sngi ki la ïoh ban kurup shibun bah ki biskit ksiar kiba shongdor haduh kumba T. 3 klur hapoh ka steshon rel na Guwahati.
Ki khubor ki ïathuh ba ki pulit ka tnat Railway ki la pynlong ka jingkhynra ha ki bynta jong ka Paltan Bazar Railway Station ha kaba ki la ïoh ban kurup noh ïa shibun bah ki biskit ksiar na ka rel Rajdhani Express.
Kine ki biskit ksiar kiba don baroh 20 tylli bad kiba khia 3.20 kilo la suba ba kin kot sha ka 3 klur tyngka. Halor kane ka jingjia ki pulit ki la kem noh ïa uwei u briew ïa uba la tip kyrteng kum u Sharif Alam.
Ha kajuh ka por la pynthikna ruh ba ïa kine ki biskit ksiar la wan kit tuh napoh Manipur bad thmu ban pynpoi sha ka nongbah jong ka ri sha Delhi hynrei kila shah kurup noh ha Guwahati.
Kaba kum kane ka jingjia ïoh kurup biskit ksiar ka la jia ruh hynnin ka sngi 7 tarik, ha kaba ki pulit ka tnat Railway ki la ïoh ban kurup katto katne ki biskit ksiar napoh ka steshon rel na Guwahati. Halor kane la kem ruh ïa uwei u briew uba la tip kyrteng kum u Sampat Rao.
Na une u briew la ioh ban kurup kumba 320 gram ka ksiar.Katkum ki tyllong khubor la ong ba une u suba u la shah kem noh hadien ba ki pulit ki la ïoh ïa ka jingtip kaba thikna ha kaba ïadei bad une u nongkhaïi ksiar beaiñ. Nalor kata la ong ruh ba kane ka ksiar ba la ïoh kurup ka shongdor kumba T.20 lak.
