Namar ka BJP ka phla ba ka dei tang ka jingpynbiej elekshon ngim lah shuh ban ujor Defamation Case: HITO

Halor ka jingkynnoh ba dei ka jylla ba bamsap tam

0

Shillong, Lber 08: U President ka Hynniewtrep Integrated Territorial Organisation (HITO) u Bah Donbok Dkhar u la ong ba ka jingthmu ka seng ban ujor da ka defamation case ne ka mokotduma mynraiñ khmat ïa ka BJP halor ka jingkynnoh jong ka ba ka jylla Meghalaya ka dei kaba bat ïa u Number One ha ki kam bamsap kam don jingmut shuh ba kan ïaid sha khmat ïa ka jingujor namar u National Vice President ka BJP uba dei peit ïa ka Meghalaya u Dr M Chuba Ao u la phla ba ka dei tang ka jingpynbiej elekshon ïa ki nongshong shnong ka jylla.
Haba kren sha ki lad pathai khubor u Bah Donbok u la ong ba ha ka jingshisha ka seng ha ka ha ka 19 Rymphang ka la buh jingthmu ban ïaid da ka mokotduma ïa ka jingkynnoh u Amit Shah mynraiñ khmat lada ka BJP kam thung jingtohkit halor ka jingbamsap kiba pher bapher kiba kum ka seng ruh la bun bun sien ka la phah dorkhas sha ki Myntri Sorkar pdeng ban thung jingtohkit da ka CBI ne ED.
“Namar u Ao u la phla ba ka dei tang ka jingpynbiej elekshon aiu shuh ngin lah ban leh hynrei nga kwah ban kyntu ïa ki paidbah ka jylla ba kim dei ban dang ïai biej ha ka jingpynbiej elekshon kine ki party na rithor,” u la ong.
“Nga kwah ruh ban ong ïa kine ki party rithor kiba wan tang ban lehkai ïa ka jingsngew u paidbah ba sahngeh shi syndon kane ka kam buit poh ban pynbiej ïa ki nongshong shnong ba lui lui ka jylla,” u la bynrap.

Leave A Reply

Your email address will not be published.